Депутат министрден ұялы телефонын тауып беруді сұрады

АСТАНА, 13 қазан – Sputnik. Ішкі істер министрі Ержан Сәденов депутатқа смартфонды тауып беруге уәде берді, деп хабарлайды Sputnik Қазақстан тілшісі.

Бүгін қоғамдық тәртіп мәселелеріне арналған үкімет сағатында депутат Самат Нұртаза жоғалған смартфондар мәселесін көтерді.

"Сіз 1,5 млн камерамыз бар, 58 пайыз қылмыс ашылып жатыр деп тұрсыз. Қарапайым сұрақ, онда неге жоғалған смартфондар табылмайды? Менің арызым әлі жатыр. Бір жарым жыл болды. Жарайды, мені қойшы, қарапайым халық қаншама смартфонын жоғалтады. Ішінде қымбатты суреттері, байланыс нөмірлері болады", - деді Нұртаза.

Ішкі істер министрі Ержан Сәденов депутат жоғалтқан смартфон сұр схемамен жеткізілуі мүмкін деген болжам жасады.

"Өйткені шынымен де таба алмай жатырмыз. "Пиратский" дейді, сондай болуы мүмкін. Сондықтан ұялы телефонды сатып алғанда мұқият қарау керек. Жалпы, проблема бар",-деді Сәденов.

Министр депутаттың ұялы телефонын тауып беруге уәде берді.

"Мына жерде әріптестеріміз отыр, Лепеха, Әділов (министрдің орынбасарлары - Sputnik) отыр. Аша алмай жүргендер…Қараймыз. Табамыз",- деді ол.