Атырауда Halyk Bank жаңа кеңсесі ашылды

Атырауда Halyk Bank облыстық филиалының жаңа кеңсе-ғимараты пайдалануға берілді. Салтанатты шараға Halyk банкінің басқарма төрайымы Үміт Шаяхметова және Атырау облысының әкімі Серік Шәпкенов қатысты. 

Жаңа кеңсе айына 5 000-нан астам клиентке қызмет көрсете алады. Заманауи үлгідегі ғимаратта банк тұтынушылары үшін сапалы қызмет түрлерімен қоса қауіпсіздік және жайлылықтың жоғары стандарттарын қамтамасыз ететін технологиялық шешімдер жүзеге асырылған. 

Атырау қаласының іскерлік орталығынан бой көтерген жаңа кеңсенің жалпы аумағы 9 мың шаршы метрден асады. Бұл Halyk банктың өңірде жүзеге асырған ең ірі жобаларының бірі. Құны 10 млрд теңгеден асатын инвестицииялық жоба 2024 жылы басталып, биыл пайдалануға беріліп отыр. Жаңа ғимарат осы заманғы ең озық технологияға негізделген. 

Жанна Майкопова, Halyk Bank облыстық филиалының директоры:

- Болашақта өңірдегі заңды және жеке тұлағаларымызға қызмет түрлерін көбейтеміз. Сондай-ақ мұнда өмірді сақтандыру, мүлікті сақтандыру, инкассация секілді барлық еншілдес компанияларымыз шоғырланатын болады. Заңды тұлғаларға қызмет көрсету бөлімінде автокасса жұмыс істейді. Онда түскен құжаттар жедел өңделеді. 

Биыл Атырау облысында Halyk банкі қызмет көрсететін корпоративтік клиенттердің кредиттік портфелі 428 млрд теңгеге жетті. Ондағы шағын және орта бизнесті несиелеу үлесі 65 пайызды құрайды. Облыс орталығы мен аудандарда банктің 17 бөлімшесі жұмыс істеп тұр.

Үміт Шаяхметова, Halyk Bank басқарма төрайымы:

- Бұл ғимарат – Атырау облысының дамуына қосқан кезекті үлесіміз. Біз тек банк ғимараты емес, клиенттеріміз үшін заманауи үлгідегі сервистік қызметтің сапасын жетілдіре беретін боламыз. Енді біздің цифрлық қосымшаларымызбен жұмыс істеу мүмкіндігі артады. Жалпы алғанда біз өңірде 1 трлн теңгенің жобасын несиеледік. 

Қазірдің өзінде Атыраудың қаржы нарығындағы банктің үлесі 70 пайыздан асады. Сондай-ақ Halyk банк өзге өңірлердің әлеуметтік дамуына үлес қосып келе жатқан ірі қаржы институты. Өткен бес жылда Halyk Group әлеуметтік бағдарламаларға 143 млрд 8 млн теңге бөлген. Ол еліміздегі білім беру, экология, мәдениет, денсаулық сақтау және спорт салаларында көптеген жобалардың іске асуына ықпал етті.

Авторлары: Арыстанбек Кенже, Айбек Байзақов, Жандос Рахметуллин