Атырауда полиция ірі инвесторларға заңсыз айыппұл салған: Прокуратура араласты

Атырау облысында прокурорлар ірі инвесторларды заңсыз әкімшілік жауапкершілікке тарту деректерінің жолын кесті. Өңірлік Полиция департаменті қолданыстағы ережелерді айналып өтіп,  кәсіпкерлерге айыппұл салғаны анықталды.

Қадағалаушы органның түсіндіруінше, отандық заңнамаға сәйкес, елімізде маңызды инвестициялық жобаларды жүзеге асырып жатқан компанияларға қатысты кез келген әкімшілік іс қозғау тәртібі қатаң регламенттелген. Мұндай шаралар тек прокурордың ресми келісімімен ғана жүзеге асырылуы тиіс.

Алайда Полиция департаментінің қызметкерлері бұл бекітілген алгоритмді өрескел бұзған.

«Көші-қон заңнамасын бұзды деген айыппен аймақта жалпы құны 39,6 миллиард теңгені құрайтын жобаларды іске асырып жатқан екі инвестор әкімшілік жауапкершілікке тартылған. Бұл ретте полиция өзінің іс-әрекетін қадағалаушы органмен мүлдем келіспеген», — деп хабарлады Атырау облысының прокуратурасынан.

Прокурорлық қадағалау шараларының нәтижесінде шетелдік кәсіпкерлердің құқықтары толық көлемде қалпына келтірілді. Полицейлердің айыппұл салу туралы барлық заңсыз қаулыларының күші ресми түрде жойылды. Ведомство өкілдері бұл заңбұзушылыққа жол берген кінәлі лауазымды тұлғалардың қазірдің өзінде тәртіптік жауапкершілікке тартылғанын қоса кетті.

Облыстық прокуратура мемлекеттік және құқық қорғау органдарының жұмысына жүйелі түрде мониторинг жүргізіліп жатқанын, ал бизнес пен инвесторлардың қызметіне заңсыз араласуға бағытталған кез келген әрекеттерге бұдан былай да қатаң тосқауыл қойылатынын қадап айтты.

Бүгін, 09:37