Атырауда жекеменшік мектептерді қаржыландыру мәселесі көтерілді

Көпті алаңдатқан бұл мәселе кәсіпкерлер палатасының алаңында талқыланды. Кәсіпкерлер басқармадан алдын ала еш хабарлама алмағандарын айтады. Өтініштерін қарастыру кезінде басқарма өкілдері «жүйеде ақау шықты» деп, кері қайтарып алуды сұраған.

— Біз жан басына шаққан қаржыландыру алу үшін алдын ала өтініш жолдаймыз. Сол кезде білім басқармасы басшысының орынбасары Света ханым кешкі сағат 22:00 шамасында хабарласып, порталда ақау бар екенін айтып, өтінішді кері қайтаруды сұрады. «Ертең қайта ашып береміз» деген соң, басқарма өкілінің сөзіне сеніп, біз еш күмәнсіз орындадық. Алайда келесі күні ол хабарламаларын өшіріп, байланысқа шықпады. Кейін өзіміз барып сұрағанда, «қаражат бере алмаймыз» деген жауап алдық. Бұл жағдай біз үшін түсініксіз әрі әділетсіз. Әріптестеріміздің айтуынша, Алматыда да осындай мәселе болған, бірақ олар қаржысын алып үлгерген, — деді жекеменшік мектеп өкілі Акбар Новаров.

Мектеп басшылары білім мен тәрбие сапасына аса мән берілетінін айтып, жұмыстың мемлекеттік білім ордаларымен бірдей жүріп жатқанын жеткізді. Жаңа жылдан бастап екі тарап арасында келісімшарт жасалмағандықтан мектеп қызметкерлеріне айлық төлеу мәселесі туындаған.

Акбар Новаровтың айтуынша, бірнеше жыл бұрын өңірде апатты және үш ауысымды мектеп мәселесі өршіп тұрғанда әкімдік кәсіпкерлерді білім беру саласында жұмыс істеуге шақырған. «Енді бұл нарыққа үлкен ойыншылар кіргенде шағын мектептер керек болмай қалды» деген пікір бар.

Атырау облысының білім беру басқармасы хабарлағандай, 2025–2026 оқу жылында жекеменшік білім беру ұйымдарында орта білім беруге мемлекеттік тапсырысты орналастырудың жаңа тетігі пилоттық жоба ретінде енгізілді. Бұл жоба Қазақстан Республикасы Оқу-ағарту министрлігі мен өңір әкімдіктерінің бірлескен бұйрығы, сондай-ақ ҚР Білім және ғылым министрінің 2017 жылғы 27 қарашадағы № 597 бұйрығына сәйкес жүзеге асырылып отыр.

— Жекеменшік мектептерді қаржыландырудың негізгі мақсаты — үш ауысымды мектеп мәселесін шешу және апатты мектептердің орнына балама шешім ұсыну. Қазіргі таңда біз қаржыландырып отырған 20 мектептің үшеуі — «Бином». Олар бұл бағытта айтарлықтай көмек көрсетіп отыр. Себебі, бұл мектептерде 12 мың бала оқиды. Жалпы кейбір жекеменшік мектептердің аталған мәселелерді шешуге қосқан үлесі жеткіліксіз. Қазіргі уақытта бұл бағытта келіссөздер жүргізіліп жатыр. Осы оқу жылын аяқтауға қолдау көрсетуге тырысамыз. Алайда келесі жылдан бастап жекеменшік мектептерді қаржыландырмаймыз, — деп пікір білдірген еді кездесуде облыстық білім беру басқармасы басшысының орынбасары Света Аманшиева.

Басқарма өкілінің сөзінше, өңірдегі жекеменшіктегі білім ордаларының басым көпшілігі бастауыш білім береді және ұлттық бірыңғай тестілеуге дайындайды.

Бүгін Атырау облысы білім беру басқармасының басшысы Марат Абуовтың төрағалығымен 22 жекеменшік мектептің басшысының қатысуымен жиын өтті.

Күн тәртібінде екі мәселе қаралды: жекеменшік мектептерде білім сапасын арттыру және жыл соңына дейінгі қаржыландыру.

— Жиын барысында жекеменшік білім беру ұйымдарындағы оқу сапасын көтеру бағытындағы жұмыстар талқыланып, нақты міндеттер айқындалды. Сонымен қатар, мектептердің оқу жылының соңына дейін толық көлемде қаржыландырылатыны атап өтілді, -деп мәлімдеді білім беру басқармасының баспасөз қызметі.

Жалпы қаржыландыру «e-Qazyna» цифрлық платформасы арқылы жүргізіледі. А1 компоненті бойынша (білім беру процесін қаржыландыруға арналған негізгі бағыт) қаражат жекеменшік мектептерге мемлекеттік білім беру тапсырысын орналастыруға бағытталған.

Бұған дейін Оқу-ағарту министрлігі жекеменшік мектептердің жағдайына қатысты түсінік берді.