Атырауда зираттың жанына қалдық су төгіліп жатыр

Атырау маңындағы Тасқала-3 бау-бақша қоғамында тұрғындар жағымсыз иістен зардап шегіп отыр - белгісіз біреулер кәріз қалдықтарын тікелей зираттың жанына тұрақты түрде төгеді.

Куәгерлердің айтуынша, қалдық су қабірдің жанындағы жермен ағып, айналасын ластап, шіріп, жергілікті тұрғындардың наразылығын тудырып отыр: олар бұл жағдайды марқұмдардың рухын қорлау дейді.

"Біздің үйдің жанына үнемі сарқынды су төгіледі. Әсіресе жазда иісіне шыдау мүмкін емес. Бұл жақын жерде тұратын адамдардың денсаулығына қауіп төндіреді", - дейді тұрғындардың бірі.

Осы маңдағы тұрғындардың айтуынша, бұл сулар бірнеше аптадан бері төгіліп жатыр, әлі де жалғасып келеді. 

"Қала билігінің араласуын сұраймыз. Тексеру жүргізіп, мұны кім істеп жатқанын анықтасын. Егер бұл жеке тұлғалар немесе ұйымдар болса - қатаң жазасын алсын. Біз мұндай жағдайда өмір сүруден шаршадық", - деп жазады олар әкімдікке жазған хатында. 

Тұрғындар бұл жағдайды дереу тоқтатуды және кінәлілерді жазалауды талап етіп отыр. Қаланың ішіне, адам тұрып жатқан жерге кәріз суларының төгілуі масқара емес пе дейді олар. 

Редакция Атырау әкімдігіне зират аймағының санитариялық жағдайына кім жауап беретінін жәнеосы жағдай бойынша қандай шаралар қабылданатынын сұрап, сауал жолдады.

Айгүл МАНСУРОВА

Тұрғындар жолдаған сурет

Бүгін, 10:52