БҚО да кәріз суы неліктен қоқыс алаңына төгіліп жатыр әкімдік жауап берді

Қоғам белсендісі Алмагүл Иқсанованың Instagram әлеуметтік желісінде мәлім еткеніндей, Дариянда құны 250 млн теңге тұратын кәріздік тазарту қондырғысы жуырда, 2025 жылы 31 желтоқсанда іске қосылған. Соған қарамастан, осындай жағдайға жол беріліп отыр.

— Міне, ассенизатор көліктері кәріз суын қоқыс алаңына, ашық далаға төгіп жатыр. Бұл соншама қаржының желге ұшқаны ма? Егер нысан тиісінше жұмыс істемесе, бюджет қаражаты не үшін жұмсалған? Жауапты органдар қайда қарап отыр? Табиғат қорғау қызметі, жер инспекциясы, прокуратура және жергілікті атқарушы органдар тарапынан бақылау қайда? Тиісті тазартусыз және экологиялық рұқсатсыз ашық жерге қалдық пен кәріз суының төгілуі дұрыс емес деп санаймыз, — деді Алмагүл Иқсанова.

Жүргізушілер де өз сөзінде кәріздік тазарту қондырғысының жабық тұрғанын келтірген.

Осыған орай Kazinform тілшісі Бәйтерек ауданы әкімдігіне арнайы сауал жолдаған еді.

Әкімдік мәліметіне қарағанда, Дариян ауылындағы кәріздік тазарту қондырғысы бастапқыда іске қосу-реттеу жағдайында жұмыс істеген. Қазіргі таңда іске қосу-реттеу жұмыстары аяқталу қарсаңында. Нысан штаттық режимде қызмет етіп тұр, тазартудың технологиялық процестері толық көлемде қамтамасыз етілген. Жабдық жұмысы жобалық параметрлер мен экологиялық талаптарға сай келеді.

— Нысанның пайдаланылуына қосымша талдау жасалды. Соның ішінде кәріздік суды құйып алып, төгетін ассенизаторлық техникалар санына мониторинг жүргізілді. Жұмыс барысында ассенизаторлық машиналардың жекелеген жүргізушілері кәріз суын бұрынғыша төгетіні анықталды. Орнатылған тәртіптен тыс, бұлайша төгу есептің нақтылығына әсер етеді. Күні бүгін нысан жұмысы қалыпты ұйымдастырылған, заң бұзу байқалмайды, — делінген ресми жауапта.

Еске сала кетейік, бұдан бұрын БҚО-да компанияның мал өлекселері мен қалдықтарын ауыл маңына төгіп жатқанын жазған едік.