БҚО да жаңа дене шынықтыру сауықтыру кешені неліктен талапқа сай емес әкімдік жауап берді

Қоғам белсендісі Алмагүл Иқсанованың мәлім еткеніндей, аталмыш нысан өткен жылдың соңында «Қарашығанақ Петролиум Оперейтинг Б.В.» компаниясының әлеуметтік міндеттемелері есебінен салтанатты түрде ашылған. Бұған 11,1 млрд теңге қаржы жұмсалған.

— Осындай қаржыға салынғаннан кейін дене шынықтыру-сауықтыру кешені талапқа сай болуы керек қой. Біріншіден, доптар жоқ. Оның біреуі 60 мың теңге тұрады, ал мұнда базардан әкелінген 3 мың теңгенің добы тұр. Екіншіден, сапасыз тренажерлік жабдық қойылған. Гимнастикалық жабдық та қазір жоқ. Қабырғалар ырық-жырық. Қолғаптар да ескі-құсқы. Турникетті тот басқан. Сырттағы септикті де ретке келтіру керек, — дейді А.Иқсанова.

Оның айтуынша, жергілікті жасөспірімдер халықаралық жарыстарда жүлде алып жүргенімен, жаттығуларына жағдай жасалмаған. 

— Өзім осы жерде туып-өскеннен кейін менің де жаным ауырады. Қазірге дейін нысан жабық тұр, балалар жаттыға алмай жүр. Шын мәнісінде «Қарашығанақ Петролиум Оперейтинг Б.В.» компаниясы аталмыш нысанның тапсырылғаны жөнінде өз парақшасында 30 желтоқсанда ақпарат жариялады. Сонда оны кім қабылдап алған? Мен компанияның өзіне де барып, талап қоямын, — деп қосты қоғам белсендісі.

Осыған орай Kazinform тілшісі Бәйтерек ауданы әкімдігіне арнайы сауал жолдаған еді. 

Әкімдік мәліметіне қарағанда, аталған кешеннің тапсырыс берушісі «Қарашығанақ Петролиум Оперейтинг Б.В.» компаниясы болса, мердігер ұйым — «Энергострой» ЖШС.

Күні бүгін нысан құрылысы аяқталған, бірақ Бәйтерек ауданы теңгеріміне берілмеген. Аталған нысан бойынша бірқатар ескертпе бар, мердігер ұйым соны жою жұмыстарын жүргізуде. 

— Қазіргі таңда ғимарат пен дене шынықтыру-сауықтыру кешені аумағын ретке келтіру үшін құрылыс компаниясы сылау жұмыстарын атқаруда. Атап айтқанда, тренажер, күрес залдарында, дәлізде сылау-бояу, жөндеу жұмыстары жүргізілді. Кешен аумағы тазаланғаннан кейін құрылыс қалдықтары шығарылады. Спорттық құрал-жабдықтар мердігер ұйыммен жобаға, техникалық талаптарға сәйкес сатып алынған. Қосымша құрал-жабдықтарды спортшылардың өздері әкелген. Сонымен қатар аталмыш нысан бойынша кепілдік міндеттемелер бар, ол ҚР заңнамасына сәйкес орындалатын болады, — делінген ресми жауапта.

Еске сала кетейік, бұдан бұрын БҚО-да жаңадан салынған мектеп ғимараты екі жыл өтпей неліктен жабылғанын жазған болатынбыз.