БҚО да тазарту қондырғысы жанында кәріз суы далаға ағып жатыр

Қоғам белсендісі Алмагүл Иқсанованың Instagram әлеуметтік желісінде мәлім еткеніндей, тазарту қондырғысына құйылған лас су далаға ағып жатыр.

— Бұл жерден өту мүмкін емес. Сасық иіс бірнеше шақырым қашықтықтан сезіледі. Тазартылмаған кәріз суы шлангімен далаға ағуда. Сонда кәріздік тазарту қондырғысы не үшін керек? Осы жағдайды бақылауы тиіс экология департаменті қайда қарап отыр? — дейді А.Иқсанова.

Осы мәселеге орай Kazinform тілшісінің сауалына жауап берген Бәйтерек ауданы әкімдігінен түскен мәліметке қарағанда, Дариян ауылдық округінде орналасқан кәріздік тазарту қондырғысы қалыпты жұмыс істеп тұр. 

Сонымен қатар нысанды пайдалану барысында кәріздік тазарту қондырғысының нақты жүктемесі жобада қарастырылған көрсеткіштен асып түсетіні анықталды. Қондырғының жобалық қуаты Дариян ауылдық округі бойынша қызмет етуге есептелген. 

Әкімдік мәліметі бойынша қазіргі уақытта басқа ауылдардан, соның ішінде Рубежин және Байқоныс ауылдық округтерінен кәріз суын қабылдау көлемі өсіп отырғаны байқалады. Соның нәтижесінде кәріздік тазарту қондырғысы қабылдайтын ағынды сулар көлемі көбейген. 
Ағынды суларды тазартуда қондырғының өткізу қабілетін арттыру үшін қосымша жөндеу жұмыстары жүргізіліп жатыр.

— Қондырғының жүктемесін реттеу және оның тұрақты жұмысын қамтамасыз ету мақсатында күні бүгін ағынды сулар тасқынын уақыт бойынша белгілеу үшін ассенизаторлық техникаларды қабылдау кестесін енгізу мәселесі қарастырылуда. Жалпы, кәріздік тазарту қондырғысында технологиялық бұзушылықтар анықталған жоқ. Бірақ бұдан былай пайдалану барысында жүктемені оңтайландыру бойынша шаралар қабылдауды қажет етеді, — делінген ресми жауапта.

БҚО экология департаментінің басшысы Мұрат Ермекқалиев аталмыш мәселеге қатысты таяуда тексеріс жүргізілетінін жеткізді. 

Еске сала кетейік, бұдан бұрын БҚО-да кәріз суы неліктен қоқыс алаңына төгіліп жатқаны жөнінде әкімдік жауап бергенін жазған болатынбыз.