Атыраудағы көпірлердің жағдайы алаңдатады

Атыраудағы көпірлердің техникалық жайы тұрғындарды алаңдатып отыр. Әсіресе тәулігіне мыңдаған көлік өтетін айналма көпірде жабынның бұзылып, қосылған тұстарында жіктің ажырағаны байқалады. Жүргізушілердің айтуынша, жыл сайын жамап-жасқағанымен мәселе түбегейлі шешілмей келеді. 

Асланбек Шығыр, тілші:

- Бұл – қаладағы айналма көпір. Негізгі жүктеме осы көпірге түседі. Өйткені облыс тұрғындарынан бөлек, Өзбекстан, Түркіменстан, Ресей, одан кейін Еуропа елдеріне жүк таситын көліктер осы көпір арқылы жүреді. Салдарынан көпірдің қосылған тұстарында жігі ажыраған.

40 жыл бұрын айналма көпірге 2010 жылдан бері ағымдағы жөндеу жасалып келеді. Дегенмен тұрғындар мен жүргізушілер нәтиже мардымсыз дейді. Жергілікті билік жүктемені азайту үшін 2023 жылы қала сыртынан жүк көліктеріне арналған айналма жол құрылысын бастаған. Жоспар бойынша нысан биыл аяқталуы тиіс. Алайда бұл тек бір өткелдің мәселесін жеңілдетуі мүмкін. Себебі өзге көпірлерге қатысты шағым аз емес. 

Қуаныш Жарбосынов, қала тұрғыны:

- Жилгородок көпірі, о жақта енді шұңқыр-тесік көп енді. Көліктер былай да былай қашады, қашқанның өзінде де ұрып-соғады машинаны. Орталық көпірдің де жағдайы мәз емес. Біршама тесік. Көп. Бәріміз де жүріп жатырмыз.

Қаладағы көпірлерге 2023 жылы техникалық тексеріс жүргізіліп, апатты деуге тұрарлық нысан анықталмаған. Тіпті 1965 жылы салынған орталық көпір бойынша да «жағдайы қанағаттанарлық» деген қорытынды шыққан. Көпірді жаңғырту жобасы былтырдан бері әзірленіп жатыр. 

Қуанышбек Қабдығали, Қалалық жолаушылар көлігі және автомобиль жолдары бөлімінің бас маманы:

- Жалпы жыл сайын біз деформациялық шовтарын көіпрлердің барлығын күтіп-ұстап отырамыз. Биыл да 2026 жылы шығып тұрған темірлердің бетін қайтып тегістеп, жабатын боламыз. Орталық көпір бойынша қазіргі таңда ол көпірді техникалық тараптан жан-жақты зерделеу жұмыстары жүргізіліп жатыр. Сондықтан қорытындысы шыққан жағдайда қосымша хабарланатын болады.

«Көпірлерден бөлек, қалаішілік жолдардың сапасы да сын көтермейді», - дейді жүргізушілер. Былтыр 700 млн-ға жуық теңгеге 50 мың шаршы метр жол жөнделген. Ал биыл шамамен 30 мың шаршы метр жолды қалпына келтіру жоспарланған.

Авторлары: Асланбек Шығыр, Айбек Байзақов, Жандос Рахметуллин