Атыраулық ғалымдар ұңғыма өнімділігін арттырудың жаңа тәсілін ұсынды

Жаңа шешім сораптық-компрессорлық құбырларды үздіксіз қыздыруға арналған аралас жүйеге негізделген. Оның басты ерекшелігі – дәстүрлі инженерлік тәсілдерді күн энергиясымен ұштастырып, «жасыл» технология қағидаттарын қолдануында. Бұл өндірістегі энергия шығынын азайтып, тиімділікті арттыруға мүмкіндік береді.

Технология ұңғыма ішінде парафин мен гидраттардың түзілуінің алдын алуға бағытталған. Жүйе құбыр ішіндегі температураны 5–10°C жоғары деңгейде тұрақты ұстап тұру арқылы шөгінділердің пайда болуына жол бермейді. Нәтижесінде тереңдік сораптарының істен шығу қаупі төмендеп, өндірістегі іркілістер азаяды.

С.Өтебаев атындағы мұнай және газ университетінің ғалымдары бұл мәселенің сала үшін өзектілігін атап өтті.

– Еліміздегі кен орындарында парафин түзілуі – ең күрделі әрі жиі кездесетін мәселелердің бірі. Ол ұңғымалардың өнімділігін төмендетіп қана қоймай, жабдықтардың істен шығуына да әкелуі мүмкін, - деді техника ғылымдарының кандидаты Макс Бисенғалиев.

Оның айтуынша, жаңа әзірлеме энергия тиімділігі тұрғысынан да тиімді.

– Ұсынылып отырған жүйе гибридті қоректендіру арқылы жұмыс істейді. Бұл дәстүрлі энергия көздерімен қатар күн энергиясын пайдалануға мүмкіндік береді. Соның нәтижесінде өндіріс шығындары азайып, экологиялық әсер төмендейді, - деп толықтырды Макс Бисенғалиев.

Мамандардың пікірінше, мұндай технологиялар мұнай-газ саласындағы өндірістік тұрақтылықты қамтамасыз етеді.

Осыған дейін «ҚазМұнайГаз» қиын өндірілетін қорлардан мұнайды инновациялық технологиялармен алып жатқаны жөнінде жазған едік.