Жеміс көкөніс қалдықсыз өңделеді: Ғалымдар жаңа технология ұсынды

Бұл технология табиғи тікелей сығылған шырындар, джемдер мен жоғары функционалдық қасиеттері бар пюре өнімдерін өндіруге мүмкіндік береді.

Аталған әзірлеме Қазақстандағы жеміс-көкөніс өнімдерін өңдеу саласына айтарлықтай тың серпін береді. Елде жыл сайын 3,5 млн тонна өнім өндірілгенімен, оның тек 5%-ы ғана өнеркәсіптік өңдеуден өтеді. Ал сақтау кезіндегі шығындар 30%-дан асады. Нәтижесінде консервіленген өнімдер нарығындағы импорттың үлесі 80–85%-ға дейін жетіп отыр.

Жобаның негізгі мақсаты — отандық функционалдық өнімдерді әзірлеу және ресурсты үнемдейтін, қалдықсыз технологияларды енгізу арқылы табиғи шырындар ассортиментін кеңейту.

Әзірлеменің ғылыми жаңалығы — қызылша, сәбіз және алма шырындары негізінде пектин қосылған оңтайлы купаждалған рецептураларды жасау. Технология жергілікті шикізатты терең өңдеуге бағытталып, оның биологиялық құндылығын — антиоксиданттар, дәрумендер мен тағамдық талшықтарды барынша сақтауды қамтамасыз етеді.

— Термоөңдеу мен гомогенизация процестерін оңтайландыру технологиялық шығындарды азайтып, дайын өнімнің сапасын арттыруға мүмкіндік берді. Алынған өнімдер профилактикалық қасиеттерге ие және жүрек-қан тамырлары аурулары мен зат алмасу бұзылыстары бар адамдарға пайдалы болуы ықтимал. Жоба аясында ғылыми нәтижелер халықаралық басылымдарда жарияланып, өнім өндіру технологиясы мен пектин алу әдісіне патент алынды, — делінген хабарламада.

Аталған технологияны агроөнеркәсіптік кешен кәсіпорындарында, әсіресе еліміздің оңтүстік өңірлерінде енгізу импортқа тәуелділікті едәуір төмендетіп, дұрыс тамақтану өнімдері нарығындағы сұранысқа ие жаңа сегментті дамытуға мүмкіндік береді.

Осыған дейін жеміс шараптарын өндіруге бақылау күшейтілуі мүмкін екенін жазғанбыз.