Әуежайларға авиаотынды негізсіз қымбаттатқаны үшін ірі көлемде айыппұл салынды

АСТАНА, 26 желтоқсан – Sputnik. Қазақстанның бәсекелестікті қорғау және дамыту агенттігі ел әуежайларын тексеру қорытындысын жариялады.

Ведомствоның мәліметінше өңірлерде авиациялық отынды өткізу кезінде монополиялық жоғары баға белгілеу және ұстап тұру фактілері анықталды.

Мәселен, Қостанай облысы бойынша АЗРК департаменті Ахмет Байтұрсынұлы атындағы" Қостанай" халықаралық әуежайы" АҚ қатысты тергеуді аяқтады. Әуе айлағы әкімшілігі үстем жағдайды теріс пайдаланды, дейді агенттік.

Әуежай басшылығы әкімшілік жауапкершілікке тартылды. 16,6 миллион теңге айыппұл салынып, монополиялық кіріс тәркіленді.

Агенттіктің Қызылорда облысы бойынша департаменті "Қорқыт Ата әуежайы" АҚ қызметінде заң бұзушылықтарды анықтады.

"Тергеу барысында авиаотын құнын негізсіз асыра бағалағаны анықталды, бұл да кәсіпкерлік кодекстің 174-бабы 1-тармақшасын бұзу ретінде сараланды", - деп хабарлады бәсекелестікті қорғау және дамыту агенттігі.

Әуежай әкімшілігіне 7,3 миллион теңге (14,3 мың доллар) айыппұл салынып, 2,5 миллион теңге (4,9 мың доллар) монополиялық кіріс тәркіленді.

Сонымен қатар департамент заң бұзушылықтарды жою туралы ұйғарым шығарды, нәтижесінде авиаотынды өткізу бағасы қосымша құн салығынсыз 780 000 теңгеден 533 750 теңгеге дейін төмендеді.