Ауылдық ерікті өрт сөндіру пункттерінің желісі артты

Еліміздің өңірлерінде ауылдық жерлерде өрт қауіпсіздік деңгейін арттыруға бағытталған «Ауыл құтқарушылары» ведомстволық бағдарламасы кезең кезеңімен жүзеге асырылуда. Аталған бастама аясында өртке қарсы қорғау инфрақұрылымын дамыту және нығайту бойынша белсенді жұмыстар жүргізілуде, деп хабарлайды «24KZ» ТЖМ баспасөзіне сілтеме жасап.

Өрт сөндіру пункттерінің желісін құру және кеңейту жедел қызметтердің оқиға орындарына жету уақытын қысқартуға, сондай-ақ ауылдық елді мекендер тұрғындарының өмірін, денсаулығы мен мүлкін неғұрлым сенімді қорғауды қамтамасыз етуге ықпал етеді. Сонымен қатар Ақтөбе облысы Темір ауданының Құмқұдық ауылында өрт сөндіру пункті пайдалануға берілді. Ол өрт сөндіру автомобилін қоса алғанда, заманауи жабдықтармен қамтамасыз етілген, онда 657 адам тұратын үш елді мекеннің қауіпсіздігін қамтамасыз етеді. Сондай-ақ Қарағанды облысы Осакаров ауданының Пионерское ауылында «Пионерское» ЖШС шаруа қожалығының базасында екі елді мекенді, жалпы саны 1 481 тұрғыны бар халықты қорғауды қамтамасыз ететін өрт сөндіру пункті өз жұмысын бастады. Өрт сөндіру пункті жыл бойы үздіксіз жұмыс істейді, заманауи техникамен жабдықталған және жедел әрекет етуге қажетті құрал-жабдықтармен толық қамтамасыз етілген.

Ақмола облысы Жарқайың ауданының Шойындыкөл ауылында ең жақын өрт сөндіру бөлімінен 129 шақырым қашықтықта орналасқан жаңа өрт сөндіру пункті ашылды. Ол 190 адам тұратын елді мекенге қызмет көрсетеді және ТЖД автопаркінен берілген өрт сөндіру автоцистернасымен жабдықталған. Бөлімше өрт-техникалық жабдықтармен және құрал-саймандармен толық қамтылған, бұл шақырту орнына жету уақытын едәуір қысқартуға мүмкіндік береді.

Батыс Қазақстан облысы Бәйтерек ауданының Махамбет ауылында жаңа ерікті өрт сөндіру пункті ашылды. Ашылу рәсіміне ҚР ТЖМ Өртке қарсы қызмет комитетінің төрағасы Ерлан Төрегелдиев қатысты. Жаңа бекет Махамбет, Октябрь, Жамбыл, Павлов, Кожевниково және Горбуново ауылдарының өрт қауіпсіздігін қамтамасыз етуге мүмкіндік береді, бұл елді мекендерде жалпы саны 3 743 адам тұрады. Ғимаратта өрт техникасына арналған бокс, кезекші бөлме, асхана, қойма, душ пен демалыс бөлмелері қарастырылған, сондай-ақ арнайы техника пайдалануға берілді. Батыс Қазақстан облысы Тасқала ауданының Атамекен ауылында жаңа ерікті өрт сөндіру пункті құрылды. Өрт сөндіру бекетінің ашылуы Атамекен, Алмалы, Қалмақ Шабын, Қисықсай ауылдарының өрт қауіпсіздігін қамтамасыз етуге мүмкіндік береді, бұл елді мекендерде жалпы саны 740 адам тұрады, сондай-ақ бекеттің жауапкершілік аймағына жақын орналасқан дала және орман өрттеріне жедел ден қоюды қамтамасыз етеді. Еріктілердің иелігінде өрт техникасына арналған бокс, кезекші бөлме, асхана, қойма, душ және демалыс бөлмесі бар. Бөлімшенің теңгеріміне ТЖМ тарапынан өрт сөндіру автоцистернасы мен байланысқа арналған радиостанциялар берілді.

Өрт сөндіру пункттерін құру және дамыту жергілікті атқарушы органдардың, бизнес өкілдерінің және бейжай қарамайтын азаматтардың белсенді қолдауымен жүзеге асырылуда. «Ауыл құтқарушылары» бағдарламасының жүзеге асырылуы ауылдық жерлердегі қауіпсіздік деңгейін арттыруға ықпал етеді және шалғай елді мекендер тұрғындарының өмірі мен мүлкін қорғауда маңызды рөл атқарады.