ТЖМ ерікті өрт сөндіру пункттерінің санын 700 ге жеткізуді жоспарлап отыр

Министрдің айтуынша, қазіргі таңда әр өңірде су төгу құрылғыларымен жабдықталған әуе кемелері бар авиажасақтар құрылды. Жоғары қауіпті орман аймақтарында жерүсті және әуе патрульдеу жедел топтары тәулік бойы кезекшілік атқарады.

-Ауылдық жерлерде «Ауыл құтқарушылары» ұйымдары нығайтылып жатыр. Елімізде қазірдің өзінде 167 ерікті өрт сөндіру пункті құрылды, биыл олардың санын 700-ге дейін ұлғайту жоспарланып отыр. Бүгінгі күні осы пункттер шамамен 900 өртті сөндірді, – деді министр.

Сондай-ақ оның айтуынша, табиғи өрттерге жедел әрекет ететін күштер мен құралдардың, оның ішінде орман бөлімшелерінің республикалық тобы бекітілді, оның құрамына орман шаруашылығы бөлімшелерін қоса алғанда 50 мыңнан астам адам және 11 мың техника кіреді.

Сонымен қатар ТЖМ Азаматтық қорғау академиясында орман өрт сөндіру бөлімшелерінің 360 басшысы алдын ала оқытылды.

Осыған дейін Олжас Бектенов Абай облысында Төтенше жағдайларды жою жөніндегі республикалық жедел штаб отырысын өткізгені туралы жаздық.