Ауыз судың сапасы қалай бақыланады?

Ауыз судың сапасы – елдің санитарлық-эпидемиологиялық қауіпсіздігі мен халық денсаулығының басты кепілі. Соңғы жылдары ауылдық жерлерде су тазалығының төмендігі, құбыр жүйелерінің ескіруі және бақылау тетіктерінің жеткіліксіздігі мәселесі жиі көтеріліп жүр, деп хабарлайды Arasha.kz.

Осы орайда судың сапасын бақылау жүйесі қалай жүргізілетіні туралы ҚР Төтенше жағдайлар министрлігіне қарасты Құрылыс және тұрғын үй-коммуналдық шаруашылық істері комитеті төрағасының орынбасары Нұрсұлтан Керімқұлов түсіндіріп берді.

«Судың сапасын бақылау Денсаулық сақтау министрлігіне қарасты санитарлық-эпидемиологиялық мекемелер арқылы жүзеге асырылады. Бұл мекемелер аптасына немесе айына белгіленген кесте бойынша судан сынама алып, оның химиялық және биологиялық құрамын тексеріп отырады. Ал ірі қалаларда арнайы зертханалар бар. Сол зертханалар тәулік бойы жұмыс істеп, сағат сайын судың сапасын қадағалайды. Яғни күн сайын, апта сайын және ай сайын белгіленген нормаларға сәйкес тексерулер жүргізіледі», – деді ол.

Н.Керімқұловтың айтуынша, егер алынған сынамалар теріс көрсеткіш көрсетсе, яғни судың сапасы белгіленген талаптарға сай келмесе, онда су құбырларын жаңарту немесе реконструкциялау жөнінде өтінімдер дайындалып, тиісті шаралар қабылданады.

«Әрине, кейде судың сапасының төмендеуі су құбырларының тозуына байланысты болады. Мұндай жағдайда инфрақұрылымды толық жаңарту қажет. Бұл бағытта мемлекет тарапынан бірқатар жобалар іске асырылып жатыр», – деді комитет төрағасының орынбасары.

Осылайша, елімізде ауыз судың сапасы жүйелі түрде бақыланады. Дегенмен, кейбір өңірлердегі су жүйелерін жаңарту қажеттілігі әлі де өзекті мәселе болып отыр. Судың қауіпсіздігі мен сапасы – халықтың денсаулығы мен тұрмыс сапасының тікелей көрсеткіші екенін ескерсек, бұл бағыттағы жұмыстарды күшейту уақыт талабы.