Автобус жолағы жойылды, бірақ таңба қалды Алматыда Саин көшесімен қалай жүруге болады

31 тамызда Саин көшесінде қоғамдық көлікке арналған арнайы жолақтың пилоттық жобасы аяқталды. Алайда, жүргізушілердің айтуынша, аталған учаскедегі таңбалау толық өшірілмеген. Сонымен қатар ол жерде бұрынғы режимде жұмыс істеп тұруы мүмкін бақылау камералары орнатылған, сондықтан жүргізушілер айыппұл арқаламас үшін сақталған таңбасы бар жолаққа шығуға қорқады. Автокөлік иелері бір жолақпен жүруге тырысады, бұл жолдағы көлік кептелісін арттырып отыр.

Tengri Auto Алматы қалалық жол қозғалысын ұйымдастыру және жолаушылар көлігі басқармасына камералар бұрынғы арнайы жолаққа шығуды тіркей ме, таңбалау әлі өшірілмеген болса, ол арқылы жүруге бола ма және оны қашан толық демаркациялау жоспарланғанын нақтылау үшін сауал жолдады.

Сондай-ақ редакция қаладағы арнайы жолақтар бойынша алдағы жоспарлар мен олардың Саин көшесіне қайта оралу мүмкіндігін сұрады.

Басқарма Саин көшесіндегі пилоттық жоба 2024 жылдың маусым-тамыз айлары аралығында жұмыс істегенін еске салды.

"Алматы қаласының жол желісінде қоғамдық көлікті дамыту және оның басымдығын қамтамасыз ету мақсатында биыл маусым-тамыз айлары аралығында Саин көшесі бойында қоғамдық көлікке арналған арнайы жолақты ұйымдастыру бойынша пилоттық жоба іске асырылды", - деп жауап берді ведомство.

Басқарма мәліметінше, жоба жақсы нәтижелер көрсеткен, әсіресе қарбалас уақытта тиімді болған.

"Сонымен бірге, жүргізілген талдау арнайы жолақтардың ұзақ мерзімді перспективадағы тиімділігі жекелеген оқшауланған учаскелер есебінен емес, қаланың негізгі магистральдарында қоғамдық көліктің басымдығын қарастыратын өзара байланысты көлік жүйесі аясында қамтамасыз етілуі тиіс екенін көрсетті", - деп атап өтті мамандар.

Осылайша, басқарма арнайы жолақтар біртұтас жүйе ретінде жұмыс істеуі керек деп есептейді. Бұл ретте, қоғамдық көлік үшін жаңа жолақтар құру жоспарланған нақты учаскелер аталмады.

Ескі таңбалау сақталған учаскемен қазір жүруге бола ма деген сұраққа басқарма қолданыстағы жол қозғалысын ұйымдастыру схемасына сілтеме жасады.

Олардың айтуынша, Саин көшесіндегі қиылыстарда, кіреберістер мен шығаберістерде және жанама көшелермен түйіскен жерлерде 1.11 таңбасы сақталған. Ол қозғалыс жолақтары арасындағы шекараны белгілейді және үзік-үзік сызық жағынан қатар ауыстыруға рұқсат етілген жерлерді көрсетеді.

Бұл ретте басқарма камералардың бұрынғы автобус жолағына шығуды тіркейтін-тіркемейтінін және жүргізушілердің бұл үшін айыппұл арқалауы мүмкін екенін нақтыламады.

Автокөлік жүргізушілеріне Жол қозғалысы ережелерінің (ЖҚЕ) талаптарын басшылыққа алу ұсынылды.

"Жол қозғалысына қатысушылар ҚР ЖҚЕ талаптарын басшылыққа алуы және қажетті қозғалыс жолағын алдын ала таңдап, бекітілген жол қозғалысын ұйымдастыру схемасын ескере отырып, маршрутты түзетіп, қатар ауыстыруды тиісті жол таңбаларында қарастырылған орындарда ғана жүзеге асыруы қажет", - деп жауап берді басқарма.

Саин көшесіндегі арнайы жолақ пилоты аяқталды: әкімдік алдағы жоспарлар туралы айтты

Бізді Google-дың негізгі дереккөздер тізіміне қосыңыз