Автобуста ән шырқайтын 7 жасар Мария халықтың көзайымына айналған

Қазақша ән шырқап, тәтті дауысымен жұрттың көзайымына айналған кішкентай Марияны білмейтін адам кем шығар.

7 жастағы алматылық әлеуметтік желінің жұлдызына айналды. 

Оның автобуста келе жатып айтқан «Отан ана» әнінің түсіріліміне мыңдаған адам лүпіл басып, қолдау білдірген. Мария өскенде қазақша ән шырқап, әлемді мойындатам, дейді.

Марияның осы әні әлеуметтік желіде үлкен қолдауға ие болды. Ол тілі шыққаннан ән айтады. Балабақшаға кетіп бара жатып, автобуста жолаушыларға ән айтып беруді әдетке айналдырған. Бас кезінде ата-анасы аса мән бере қоймаған. Кейін әннің сөзін тез жаттап алатынын, оны орындаушыға еліктеп нақышына келтіріп айтатынын байқаған. Анасы қызының музыкаға бейімі барына көз жеткізген соң балалар шығармашылық орталығына берген. Ұстазының айтуынша, Марияның есте сақтау қабілеті өте жақсы.

Светлана Әбділдаева, шығармашылық орталық жетекшісі:

- Мария Исаенко өзі дарынды. Қазақ ұлттық әндерді сүйіп орындайды. Біз оны мақтан тұтамыз Мариямды. Өзі сабақтарға қуана-қуана келеді. Жаңа өлеңдерді меңгеруге асығады. Өзі сүйіп орындайды. Содан кейін жанды даусымен жан жүрегімен оайтады. Сонысымен таңғалдыратын жан. 

Мария шығармашылық орталықта вокал, скрипка, домбыра сияқты бірнеше үйірмеге қатар барып жүр. Оған қоса сурет салғанды ұнатады. Түрлі байқауларға да шақырту алған.

Мария Исаенко, 1-сынып оқушысы:

- Жаз кезінде домбыра сабағына бір рет барып көрдім. Бірден ұнаттым. Содан бері қалмай келіп жүрмін. Ата-анам арнайы маған арнап домбыра жасатып берді. Өскенде әнші болғым келеді. Қазір ең сүйіп орындайтын әндерім Отан ана мен Бір бала. Содан кейін Дударайды айтам. Осы шығармалардың өзі мені қазақ тілін үйренуге жетеледі. 

Марияның мектептегі ең жақсы көріп оқитын пәні де қазақ тілі. Әзірге толық меңгере қойған жоқ. Бірақ көп уақыт өтпей мемлекеттік тілде сөйлеуге сөз берді. Қазір ұстаздары басқа да қазақтың халық әндері мен композиторларының туындыларын үйретіп жатыр. Анасы да қызының музыкалық қабілетін дамыту үшін бар жағдайды жасаймын, дейді.

Кристина Исаенко, Марияның анасы:

- Біз бұлай әлеуметтік желіде танымал болып кетеміз деп мүлдем ойлаған жоқпыз. Автобуста ән айтып отырғанда жолаушылар түсіріп алып салған ғой. Содан кейін өзіміз де парақша ашып жүргізе бастадық. Барлығы талантын дамыта түсу керек деп жақсы пікір жазып жатыр. Баланың өзі музыканы жақсы көріп тұр. Талантын ұштауға қолдан келгенше жұмыс істеп жатырмыз. Көбіне қазақ тілінде айтады. Ол өзінің қалауы. Ешкім оған міндеттеп жатқан жоқ. 

Мария жақында тағы бір шығармашылық орталықпен бірге Дубай, Стамбул және Баку сияқты қалаларды аралап қайтады. Онда өзі сияқты талантты балалармен бірге концерт береді.

Қарлығаш Қайыпбекова, Радик Жакупов