Автотұрақ ешкімнің меншігі емес

Көпқабатты үйдің ауласындағы онсызда тоқымдай ғана жерді меншіктеп, құлып салып қойғандар кім? Өз көлігім тұрса болды, өзгенікі не болса о болсын дейтіндер осылар. Өкініштісі қалада осындай жағдайлар көп.

Мінекей, көріп тұрғанымыздай, әрбір көлік иесі металл конструктор орнатып қойған. Бұл қаншалықты заңды? Қазір анықтап білеміз.Дәл осы автотұрақты жеке меншігіне айналдырған жүргізушілердің бірімен тілдестік. Оның айтуынша, тұрғын үйдегі көршілер ортақ келісімге келіп, орындарды өзара бөліп алған.

- Бұл жерге мына құрылғыны қашан қойдыңыз? Бұл орын енді сіздікі бола ма?

- Осыны қойғаныма бір 10-12 жыл болған шығар, есімде жоқ. Бізде инициатив бойынша тізім жасап, осы подъездің тұрғындары шешім қабылдап, қол қойып, бір-бірімізге сондай шешім қабылдадық.

- Қандай құжат бар?

- Үшінші қабатта тұрып жатқан бір тұрғынымыз бар. Соның қолында болған.

Ал пәтер иелері кооперативінің төрағасы мұндай келісімнен бейхабар екенін алға тартты. Автотұраққа металл конструктор орнатуға өзі де түбегейлі қарсы. Өйткені ол аумақ жеке секторға емес, әкімдікке тиесілі, - дейді ол.

Әлиям Хайроллақызы, ПИК төрағасы:

-  Жаңа адамдар көшіп келген кезде «Біз неге қоя алмаймыз?» деп айтып жатады. Қар тазалаған кезде қиын. Мына жақты ғана көлік тазалайды, әкімдіктің қызметкерлері келеді. Ал мынау тазаланбай қалады. Кейін тұрғындар неге тазаламайсындар деп бізге айтады. Мыналар тұрса, қалай тазалайды? Ал адамдар мұның қағаздары бар келіскен дейді, бірақ ол қағазды мен көрген жоқпын.

Ауланың кіреберісіне шлагбаум орнатылған. Яғни дәл осы үйдің тұрғындары ғана мұнда көлігімен кіре алады. Соған қарамастан әрбір орынға не үшін металл конструктор қойылғаны түсініксіз. Заңға сүйенсек, егер автотұрақ жекеге тиесілі болса және меншік иесінен шағым түспесе, жауапкершілік қарастырылмайды. Ал ортақ пайдалануға берілген мемлекеттік мүлікті ешкім өз бетінше иемдене алмайды.

Бауыржан Бәкір, қалалық ПД Әкімшілік полиция басқармасының бөлім инспекторы:

-  630-бапқа сәйкес, жеке тұлғаларға 3 МРП, заңды тұлғаларға 10-нан 40 МРП көлемінде айыппұл жазылады. Онда жердің қабатын бұзу және тескені жөнінде әкімшілік хаттама толтырылады. Ал мына жағдайда КСК-ның өзі айтып отыр, автотұрақ ортақ пайдалануға иемденілген. Әкімдікке қарайды дейді. Сондықтан осы участокке нұсқама жіберіледі бөлшектеу жөнінде. Сосын нұсқаманы қадағалап отырамыз.

Автотұрақтар мемлекет меншігіне қайтарылды

Полиция қызметкерлері жол бойында орналасқан автотұрақтарға да жиі тексеріс жүргізеді. Астана көшелеріндегі мұндай орындар мемлекет меншігіне қайтарылды. Әкімдік пен жеке компания арасында тиісті құжаттарға қол қойылды. Қос тараптан да өтемақы талап етілмейді. Жергілікті билік енді тарифті бұрынғыдай әр минут үшін емес, сараланған тәртіппен енгізуді көздеп отыр.

Жеңіс Қасымбек, Астана қаласының әкімі:

 - Біз әлемдік тәжірибеге сүйенеміз. 15 минут, жарты сағат, бір сағат дегендей белгілі бір уақыт қойылады. Ол қаланың әр аумағындағы жүктемеге байланысты. Әрине, сараланған төлем болады, бірақ минуттап төлеу қарастырылмайды.

Әлеуметтік нысандардың маңындағы автотұрақтар тегін күйде қала береді. Ал кептеліс жиі болатын басты көшелерде орын ақылы әрі қымбат болуы мүмкін. Жылжымайтын мүліктерді мемлекетке қайтару процесі толық аяқталған соң, мәселе қайта пысықталады.

Авторлары: Еркебұлан Смадияров, Қанат Махмұтов, Мадияр Қындыбаев