Ажырасып кетсе де мазасын алған: Астанада тағы бір сталкер сотталды

АСТАНА, 1 сәуір – Sputnik. Астанада тағы бір сталкер қылмыстық жауапқа тартылды, деп хабарлайды қалалық прокуратура.

Ер адам бірнеше жыл бойы ажырасып кеткен әйелінің мазасын алған.

"Жәбірленуші онымен сөйлескісі келмейтінін айтқанына қарамастан, ер адам оның үйіне келіп, кіреберіс есігін бұзып, бірнеше рет пәтерге заңсыз кірген. Бұрынғы күйеуінің заңсыз әрекеттерінен жәбірленуші қорқып, пәтерінен кетіп, анасының үйінде тұрған. Бұған қарамастан, сотталушы жәбірленушіге барып, агрессивті әрекеттер жасап, жанжал шығарған", – дейді прокуратура.

Сондай-ақ сотталушы тұрақты түрде бейтаныс нөмірлерден жәбірленушіге хабарласып, хабарламалар жіберіп отырған. Сотталушының іс-әрекеттері жәбірленушіге үрей туғызған.

Астана қаласының қылмыстық істер жөніндегі ауданаралық соты сотталушыны кінәлі деп танып, оған 100 сағат қоғамдық жұмысқа тарту түрінде жаза кесті.