Астанада тағы бір балалар травмотологиясы ашылды

Осы уақытқа дейін елордада шұғыл травматологиялық көмегі қаланың оң жағалауында орналасқан жалғыз балалар травмпунктінде көрсетіліп, кезектің көбеюіне әкеліп соқты.

– Балаларға хирургиялық көмек көрсететін жалғыз стационар – №2 Көпбейінді қалалық балалар ауруханасы. Ол – елорданың іргелес аудандарына да қызмет көрсететін балалар травмпункті бар жалғыз стационар. Бұл жағдай науқастарды жеткізу уақытын ұзартып, кезектің артуына әсер етті. Орта есеппен травмпунктке тәулігіне шамамен 300 бала жүгінеді. Сол жағалауда балалар травмпунктінің болмауы шұғыл медициналық көмекке мұқтаж балалар үшін күрделі мәселе туындатты, - деп хабарлайды Денсаулық сақтау басқармасы.

Қалалық Денсаулық сақтау басқармасының мәліметінше, 2025 жылдың соңында елордадағы балалар саны шамамен 561 мыңға жеткен. Сонымен қатар, Есіл және Нұра аудандарында осы уақытқа дейін қосымша балалар травматологиялық пункті ашылмаған.

– Осы мәселені шешу мақсатында Хусейн бен Талал көшесі, 14 мекенжайында орналасқан Ұлттық шұғыл медицинаны үйлестіру орталығының базасында жаңа травматологиялық пункт ашу туралы шешім қабылданды. Жаңа пунктің ашылуы қолданыстағы бөлімшелерге түсетін жүктемені айтарлықтай азайтып, елорданың сол жағалау тұрғындары үшін шұғыл медициналық көмектің қолжетімділігін арттырады, - деді басқарма басшысы Айнұр Төлеуова.

Қаланың бас травматологының айтуынша, травмпункт шұғыл травматологиялық көмекке мұқтаж пациенттерге қызмет көрсетеді.

– Травмпунктке стационарлық емдеуді қажет етпейтін жарақаттармен жүгінеді. Атап айтқанда: тобық буынының зақымдануы, шыбық сүйегінің сынуы, тобық сынулары, сондай-ақ орнына салуды және бекітуді қажет ететін сынулар. Мұндай пациенттер кейін тұрғылықты жері бойынша емханаларда ем алып, оңалтудан өтеді, - деді Алексей Солод.

Басқарма мәліметінше, травмпункт заманауи медициналық құрал-жабдықтармен жабдықталған және аумаққа кіруге ыңғайлы жолдар қарастырылған.

Айта кетейік, Ұлттық шұғыл медицинаны үйлестіру орталығы Республика бойынша жедел медициналық жәрдем қызметін жүзеге асырады. Оның құрамына бірегей көпбейінді аурухана кіреді. Сондай-ақ орталық санитариялық авиация арқылы пациенттерге шұғыл көмек көрсетеді.

Бұған дейін Маңғыстауда елдегі екінші бірегей жедел жәрдем станциясы ашылғанын хабарлаған едік.