Азия чемпионаты: Қазақстан қоржынына тағы бір алтын түсті

АСТАНА, 13 тамыз – Sputnik. Қазақстандық спортшылар ауыр атлетикадан жас жеткіншектер мен жасөспірімдер арасында Азия чемпионатында тағы бір алтын медаль жеңіп алды, деп хабарлайды Sputnik Қазақстан Ұлттық Олимпиада комитетінің ресми сайтына сілтеме жасап.

77 келіге дейінгі салмақта Аянат Жұмағали қоссайыс қорытындысы бойынша 237 (104+133) келіні көтеріп, алтынна алқа тақты. Ал екінші және үшінші орынды өзбекстандық спортшылар Дильнура Холдорова (224 (101+123) келі) мен Дильноза Файзуллаева (223 (100+123) келі) иеленді.

Айта кетейік, бұған дейін Снежана Кашкарова (57 келіге дейін), Бейбарыс Ерсейіт (65 келіге дейін), Ақжол Құрманбек (85 келіге дейін) жасөспірімдер арасында алтын медаль жеңіп алса, жас жеткіншектер арасында Ксения Прозорова (61 келіге дейін) топ жарған болатын.

Ауыр атлетикадан жас жеткіншектер мен жасөспірімдер арасындағы Азия чемпионаты Өзбекстанның Ташкент қаласында өтіп жатыр.