Баға 100 есе арзандайды, жаңаша өмір басталады

Axios хабарламасы негізінде Aikyn.kz жасанды интеллект қызметінің арзандауы себептерін талдайды.

Қытайлық DeepSeek компаниясының жаңа моделі күрделі бағдарламалау тапсырмаларында әлемдегі ең қуатты жүйелердің бірі саналатын Anthropic Claude Opus 4.8 деңгейіне жақын нәтиже көрсетті. Алайда олардың басты айырмашылығы – бағасында. Бірдей көлемдегі тапсырманы орындау құны DeepSeek моделінде небәрі 28 цент, ал Claude Opus 4.8 үшін шамамен 25 доллар төленеді. Яғни.қытайлық модельдің қызметі шамамен 100 есе арзан.

Шілде айында AI нарығында толыққанды баға соғысы басталды. OpenAI GPT-5.6 Luna моделінің бағасын іске қосылғаннан кейін үш апта ішінде 80%-ға төмендетті. Google тиімділігі жоғары жаңа Gemini Flash модельдерін ұсынды. SpaceXAI бағдарламалау мен зерттеу жұмыстарына арналған жаңа Grok 4.5 моделін шығарды. Ал Meta алғаш рет жабық кодты коммерциялық ЖИ моделін жариялап, қолданушыларды төмен бағамен қызықтыруда. Тек Anthropic қана қауіпсіздік пен дәлдікке басымдық беріп, өз өнімдерінің премиум бағасын сақтап отыр.

Сарапшылардың айтуынша, жоғары деңгейлі модельдердің мүмкіндіктері бір-біріне барған сайын жақындап келеді. Сондықтан тұтынушылар үшін модельді қай компания жасағанынан гөрі, оның бағасы мен жұмыс жылдамдығы маңызды бола бастады.

OpenAI-дың бұрынғы жетекшілерінің бірі Зак Касс бұл құбылысты «модельдің шекті пайдасының төмендеуі» деп атайды. Оның пікірінше, болашақта жаңа модельдердің пайдасы пайдаланушы үшін айтарлықтай айырмашылық туғызбайды.

Осы жағдайда жаңа бағыт – «ақылды маршрутизатор» қызметін туғызуы мүмкін. Олар әр тапсырма үшін өнімділігі, бағасы және жылдамдығына қарай ең тиімді ЖИ моделін автоматты түрде таңдайды. Бұл өз кезегінде жекелеген компаниялардың ЖИ қызметі үшін төлейтін қаржысын едәуір үнемдейтін болады.Дегенмен ЖИ бағасының арзандауы әлемдегі жетекші саналатын америкалық зертханалардың бизнесіне қауіп төндіреді. Себебі олар жаңа модельдерді әзірлеуге ондаған миллиард доллар инвестициялайды, бірақ бұл шығындарды жоғары бағамен өтеу барған сайын қиындай түсуде.

Соған қарамастан OpenAI бас директоры Сэм Альтман оптимистік көзқарасын сақтауда. Оның пікірінше, жасанды интеллектің арзандауы сұранысты күрт арттырады. Нәтижесінде әр операциядан түсетін табыс азайғанымен, пайдаланушылар санының өсуі жалпы кірісті сақтап қалады.

Сарапшылардың бағалауынша, АҚШ пен Қытай арасындағы бәсеке енді ең қуатты ЖИ моделін жасауға емес, ең қолжетімді әрі жаппай қолданылатын жасанды интеллект платформасын қалыптастыруға ауысып келеді.