Бағлан Іңкәрбек: спортшыларымыз Олимпиадаға дайын

Жаттығудан кейін, ұлттық құрама бас бапкері Бағлан Іңкәрбек Kazinform тілшісіне сұхбат беріп, дайындық туралы айтып берді.

- Бүгін Олимпиада ойындары алдындағы алғашқы ресми жаттығуымызды өткіздік. Дайындық ойдағыдай, жоспарға сәйкес өтті. Спортшыларымыздың көңіл күйі жақсы, Олимпиада ойындарына дайынбыз,- деді бапкер.

Ол сонымен қатар жарыс алаңы туралы пікірімен бөлісті.

- Қардың сапасы өте жақсы, жасанды қар емес. Біз барлық жағдайда жаттығулар мен жарыстарға қатысып жүрміз. Сол себепті, жарыс жолы қыйындық туғызбайды деп ойлаймын,- деді Бағлан.

Бас бапкер қарсыластардың ешқайсысы осал болмайтынын жасырмады.

- Барлық қарсылас осал емес. Сол сияқты бізде аянып қалмаймыз. Бұл - баппен бақ қатар жүретін спорт түрлерінің бірі. Бәрі ойдағыдай болады деп сенемін. Бізге қолдау білдіріңіздер,- деді ол.

Айта кетерлігі, фристайл-акробатика жарысында ел намысын Шерзод Хаширбаев, Асылхан Асан, Роман Иванов, Дінмұхамед Райымқұлов және Аяна Жолдас қорғайды.

Отандастарымыз 17 ақпаннан бастап жекелей сайыста, сонымен қатар аралас сындада бақ сынайды.

Еске сала кетсек, Шерзод Хаширбаев және Роман Иванов өткен жылғы қысқы Азия ойындарында фристайл-акробатикадан ерлер арасында синхронды секіру сынында 97.92 ұпай жинап, алтын медаль еншіледі.

Сондай-ақ, ұлттық құрама бас бапкері осы тарихи жетістіктің қалай келгенін айтып берген болатын.