Байқоңыр кешенінің 170 мың гектарға жуық жері жалдан шығарылады

Жұлдызды шаһардағы 12 мектептің 5-і, сондай-ақ мыңнан астам бала тәрбиеленіп жатқан 5 балабақша қазақстандық білім беру стандартына негізделген. Ресей Федерациясының мектептерінде 2,5 мыңға жуық, отандық мектептерде 5 мыңға жуық оқушы білім алып жүр. Ел бюджеті есебінен бөлінген қомақты қаражат баспана мәселесіне қозғау салды. Соның арқасында талай жыл жалдамалы пәтерде жүріп шаршаған отандастарымыздың өз үйіне қолы жетті.

— Қалада 351 көппәтерлі тұрғын үй бар. Баспана мәселесін шешу үшін Қызылорда облысының әкімдігі 2019 жылы «Нұрлы жер» бағдарламасы аясында 50 пәтерлі 5 тұрғын үйдің құрылысын аяқтады. Жаңа шағын аудан құрылды. Биыл қаңтар айында онда тағы 50 пәтерден тұратын 5 үйдің құрылысы аяқталып, пәтер иелеріне кілттер табысталды, — деді облыс әкімінің орынбасары, Қазақстан Республикасы Президентінің «Байқоңыр» кешеніндегі арнаулы өкілі Қайрат Нұртай.

2019 жылғы 3 сәуірде Мәскеу қаласында қол қойылған «Байқоңыр» кешенін газбен жабдықтау туралы келісімге сәйкес қаланың тұрғын үй қоры толық газдандырылды. Қала іргесіндегі Төретам және Ақай елді мекендеріне де көгілдір отын жетті. Ендігі жерде жергілікті жылу электр орталығы мазуттың орнына табиғи газ тұтынбақ. Бұл бағыттағы жұмысты келесі жылы аяқтау жоспарланған.

— Қызылорда облысының әкімдігі «Байқоңыр қаласын сумен жабдықтау және су бұру жүйелерін қайта жаңарту» жобасын іске асырып жатыр. Жоба аясында ұзындығы 94,6 шақырым су құбыры және 84,6 шақырым кәріз желілері ауысады. Қаланың спорттық инфрақұрылымының жүктелуіне байланысты спорт нысандарын ұлғайту қажеттілігі туындап отыр. Өткен жылы дене шынықтыру-сауықтыру кешенін салу, оның базасында қазақстандық балалар мен жасөспірімдер спорт мектебін ашу туралы шешім қабылданды, — деді Қайрат Нұртай.

Екі елдің «Байқоңыр» кешені жөніндегі үкіметаралық комиссиясының уағдаластығы нәтижесінде «Бәйтерек» ғарыштық зымыран кешенін құру жобасы іске асырудың белсенді кезеңіне өтті. 

— Бүгінде жерүсті технологиялық жабдықтарын жасауға және жаңғыртуға кірістік. Жобаны іске асыру үшін «Байқоңыр» кешенінің 170 мың гектарға жуық жерін жалдан шығару аяқталып қалды. Мемлекет басшысының жайылымдық жер аумағын ұлғайту жөніндегі тапсырмасы бойынша іргелес елді мекендердің ауыл шаруашылығы қажеттілігі үшін пайдаланылмайтын жер учаскелері жалдан алынады. Бұл — шамамен 28 мың гектар жер, — деді ол.

Бұған дейін Қазақстан Республикасы Жасанды интеллект және цифрлық даму министрлігінің Аэроғарыш комитеті Байқоңырдың туристік бағдарламасын ұсынған болатын.