Балалар хирургиясында жаңа мүмкіндік

Елде алғаш рет балалардың бүйрек пен зәр жолындағы тастарды лазермен ұнтақтау әдісі қолданылды. Енді мұндай операциялар ұзақ уақытқа созылмайды. Заманауи құрылғының көмегімен бүйрегінде тасы бар балаларға күрделі операцияны жасау анағұрлым жеңілдей түсті. 

Лазерлік литотрипсия деп аталатын жаңа әдіс елімізде балалар урологиясында алғаш рет енгізіліп отыр. Қажетті қондырғы Жапонияда жасалған. Бұл технологияның арқасында операция уақыты 1,5-2 сағаттан бар болғаны 20 минутқа дейін қысқарған. Бұрын мұндай балалар операциядан кейін кемі бір тәулік жансақтау бөлімінде жатса, қазір отадан соң бірден өз бөлімшесіне ауыстырылады.

Бақытжан Әбекенов, Педиатрия және балалар хирургиясы ғылыми орталығының бөлім меңгерушісі:

- Артықшылығы, біріншіден, ота кезінде зақымның азаюы. Екіншіден, ота жасау уақытының қысқаруы. Бірнеше есе қысқарады. Үшіншіден, отаның қысқаруына байланысты баланың аурухнада жату мерзімі қысқарады.

Құрылғы іске қосылғалы бері 20 бала диагностикалық тексеруден өткен. Соның ішінде дерті асқынған төрт балаға ота жасалып, бәрі сәтті аяқталған. Заманауи аппараттың көмегімен еліміздің түкпір-түкпірінен келген балалар ем қабылдауда. Түркістан облысынан келген алты айлық Гүл-Шапағат - солардың бірі.

Жұлдызай Қойшыбай, Гүл-Шапағаттың анасы:

- Баламның бүйрегінде су бар деп, қуығында грыжасы бар деп келдік. Ота лазермен өтті. Алдын ота жасаған кезде бала разрез болған екен. Бала жансақтау бөлімінде бір күн қалған екен. Қазір лазердің арқасында баламды қасыма әкеліп берді. Өзімнің қасымда болды.

Жаңа құрылғы Жапония үкіметінің «Шөп тамыры» бағдарламасы арқылы алынған. Бұл - әлеуметтік маңызы бар жобаларды қолдайтын халықаралық бағдарлама. Соның арқасында тұтас операциялық бөлме ашылып отыр.

Бақытжан Әбекенов, Педиатрия және балалар хирургиясы ғылыми орталығының бөлім меңгерушісі:

- Бұл құрылғының өзіне келетін болсақ, бірінші орында лазерная литотрипсия тұр. Яғни тастарды бөлшектеу, ұнтақтау. Бұл тәсіл балаларды зәр жолдарындағы тастарды емдеудің ең жоғарғы технологиялық және алдағы уақыттағы перспективасы зор тәсілдердің бірі болып есептеледі.

Қазір бұл орталықта зәр шығару жолының туа біткен ақауларына байланысты жыл сайын 50-ге жуық бала ем қабылдайды. Бұрын мұндай патологиялар тек ашық әдіспен емделсе, енді оталар аз жарақатты, тез және қауіпсіз форматта өтеді. Заманауи техника - сапалы медицинаның кепілі. 

Авторлары: Алуа Ералықызы, Валентин Лобанов