Баламыз науқас : Астанада алаяқтықпен айналысқан ерлі зайыптыға сот үкімі шықты

АСТАНА, 9 қаңтар – Sputnik. Астанада баласының ауруын сылтауратып заңсыз ақша жинаған ерлі-зайыпты Тотақановтар сотталды, деп хабарлайды Астана қаласының соты.

Тотақановтар 2020–2024 жылдар аралығында 2019 жылы дүниеге келген дімкәс баласы үшін үнемі ақша жинаумен айналысқан.

"Балаға бірқатар күрделі диагноз қойылған. Қаражат жинау үшін әлеуметтік желілерде таргетпен жіберілген жарнама пайдаланылған. Ерлі-зайыптының есепшоттарына жалпы сомасы шамамен 2,2 млрд теңге қаражат түскен, оның ішінде 1,4 млрд теңге қайырымдылық қаражат ретінде алынған", - дейді сотта.

Бірақ баланың еміне небәрі 6,4 млн теңге ғана жұмсаған.

Ал қалған ақшаға:

жалпы құны 47 млн теңге болатын екі пәтер;

жалпы құны 8 млн теңге болатын жер учаскелері;

"LEXUS RX 300" маркалы автокөлік – 28 млн теңге;

"Hyundai Santa Fe" маркалы автокөлік – 8,2 млн теңге;

"Toyota Camry 75" маркалы автокөлік – 15 млн теңге;

"Toyota Land Cruiser Prado 150" маркалы автокөлік (сомасы анықталмаған) сатып алынған.

Брендтік тауарлар сатып алуға және құмар ойындарға – 9,7 млн теңге жұмсалған,

"Facebook Ads" жарнама платформасының қызметтеріне ақы төлеу – 481 млн теңге.

Қарыздарын өтеуге – 349,5 млн теңге жұмсаған.

"Сонымен қатар сотталушының әрекеттерінде Қылмыстық Кодекстің 218-бабы 2-бөлігінің 1-тармағында көзделген қылмыстық жолмен алынған ақшаны заңдастыру белгілері бар екені анықталды. Сондай-ақ депозиттік шоттардағы қаражаттардан пайыз түрінде табыс тапқан", - дейді сотта.

Қылмыстық іс Астана қаласының қылмыстық істер жөніндегі ауданаралық сотында қаралды.

Оларға Қылмыстық Кодекстің 218-бабы 2-бөлігінің 2-тармағы және 190-бабы 4-бөлігінің 2-тармағымен іс қозғалған.

Алайда ерлі-зайыптылар кінәларын мойындамады.

"Сот үкімімен ерлі-зайыпты 7 жылға бас бостандығынан айырылды. 10 жыл мерзімге қайырымдылықпен айналыспайды. Мүлкі тәркіленіп, жазаларын орташа қауіпсіздік мекемесінде атқарады. Алаяқ әйелдің кәмелетке толмаған баласы болғандықтан жазасын екі жылдан кейін өтейді", - дейді ведомствода.

*Мета (Facebook және Instagram) қызметіне Ресейде экстремистік деп тыйым салынған.