Балмұздақты жақсы көретін миллиардер мен олай айтқан жоқпын дейді

Reuters хабарламасына сүйенген Aikyn.kz дипфейк неге ірі инвестициялық компанияны қорқытқанын түсіндіреді.

Berkshire Hathaway бейсенбі күні (6 қараша) хабарлағандай, YouTube платформасында бұрынғы бас директордың бейнесін қолдана отырып жасалған, өзі ешқашан айтпаған пікірлерді тарататын видеолар көбейген. Жасанды интеллект арқылы жасалған өзінің пародияларына қатысты Уоррен Баффет те үндеу жасады: «Омахадан шыққан Оракул біреу ғана».

95 жастағы инвестор, нарықты дәл болжау қабілеті үшін «Омаханың Оракулы» атанғаны белгілі. Сондықтан қаскөйлер Баффетті жасанды интеллект имитацияларында жиі қолдана бастаған. Компанияның айтуынша, визуалды бейне Баффеттің бейнесіне ұқсас болғанымен, дыбыс жазбасы жалпылама және «оның шынайы дауысын» айқын қайталамайды.

«Бұл мен емеспін» атты баспасөз хабарламасында Berkshire ерекше бір видеоны атап өтті. Видео «Уоррен Баффет: 50 жастан асқандарға арналған №1 инвестициялық кеңес (МІНДЕТТІ ТҮРДЕ КӨРУ)» деп аталады. Онда бөгде адамның дауысымен Баффеттің атынан инвестициялық кеңес беріледі.

«Баффет мырзаны танымайтын адамдар бұл видеоларды шынайы деп ойлап, олардың мазмұнына алданып қалуы мүмкін. Баффет мырза бұндай жалған видеолардың көбейіп, вирустық сипат алуына алаңдайды», – дейді компания.

Жасанды интеллектке негізделген дипфейк және дауыс генерациялау технологиялары қоғамдық тұлғалардың өте шынайы көрінетін жалған нұсқаларын жасауды жеңілдетті. Дезинформация мен беделге нұқсан келтіру қаупі күшейді.

2025 жылдың мамыр айында ФБР жасанды интеллектпен жасалған аудио және мәтіндік хабарламаларды қолданған алаяқтар мемлекеттік қызметкерлердің жеке аккаунттарына қол жеткізгісі келгенін хабарлады.

Миллиардер Уоррен Баффет бұған дейін де өзін дипфейктерде пайдалануға қатысты шағымданғаны белгілі. Оның ішінде жасанды интеллект арқылы жасалған нанымды имитациялар да болған.

2024 жылдың қазан айында, АҚШ-тағы президенттік сайлауға екі апта қалғанда, ол өзінің атынан жасалған «мен белгілі саясаткерлерді немесе инвестициялық өнімдерді қолдаймын» деген жалған мәлімдемелер туралы ескерткен еді.

Уоррен Баффет биыл Berkshire бас директоры қызметінен кетуге дайындалып жатыр, оның орнына вице-төраға Грег Абель отырады.

Уоррен Баффет дипфейктерден неге қорықты?

Berkshire Hathaway ЖИ-дипфейктері адамдарды адастырып, Уоррен Баффеттің атынан «жалған инвестициялық кеңестер таратуы мүмкін» дейді. Berkshire Hathaway мен Уоррен Баффеттің қатты алаңдауының бірнеше маңызды себебі бар.

Біріншіден, беделге нұқсан келу қаупі. Баффет – әлемдегі ең сенімді инвесторлардың бірі. Оның атымен шыққан жалған кеңестер адамдарды қате инвестициялық шешімдер қабылдауға итермелеуі мүмкін. Егер адамдар шығынға ұшыраса, олар Berkshire-ді немесе Баффетті кінәлауы ықтимал. Бұл компанияның көп жылдар бойы жинаған сенім капиталын әлсіретеді.

Екіншіден, қаржылық алаяқтық қаупі. Дипфейктер Баффет атынан «инвестициялық мүмкіндіктер», криптовалюта жобалары ұсына алады. Бұл – қаржылық сауаты төмен адамдарды алдау үшін тиімді құрал.

Баффеттің пікірлері нарықтағы акция бағаларына әсер етеді. Сурет brandequity.com сайтынан алынды. Авторлығы: ЖИ генерациялаған 

Үшіншіден, саяси манипуляция қаупі. Уоррен Баффет бұрын кейбір саясаткерлердің кандидатураларын қолдаған, сондықтан жалған мәлімдемелер қоғамға ықпал ету үшін пайдаланылуы мүмкін.

Төртіншіден, нарықтағы тұрақсыздық. Баффеттің пікірлері нарықтағы акция бағаларына әсер етеді. Оның атынан жасалған жалған хабарламалар акциялар мен биржа қозғалыстарын бұрмалауы мүмкін.

Сондықтан, бұл жерде мәселе тек жеке тұлғаға жасалған дипфейкте емес. Мәселе - ақпараттық қауіпсіздік, қаржылық сенім мен қоғамдық тұрақтылықта болып отыр.

Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.