Балогунның ойнауына рұқсат берілді: ФИФА Бельгияның наразылығын кері қайтарды

6 шілде күні ФИФА Бельгия футбол қауымдастығының АҚШ құрамасының шабуылшысы Фоларин Балогунның әлем чемпионатының 1/8 финалындағы матчқа қатысу құқығына қатысты берген шағымын «қарауға жатпайды» деп таныды. Осылайша, бельгиялық тарап енді бұл мәселеге байланысты АҚШ футбол федерациясына жүгінуге мәжбүр.

ӘЧ-2026: FIFA алғаш рет қызыл қағаз алған футболшыны жазадан босатты

Бұған дейін ФИФА Балогунның қызыл қағаз алғаннан кейінгі автоматты түрде берілген дисквалификациясын уақытша тоқтатып, оған Бельгияға қарсы матчқа қатысуға рұқсат берген болатын. Бұл шешім АҚШ президенті Дональд Трамптың ФИФА президенті Джанни Инфантинодан істі қайта қарауды сұрағаннан кейін қабылданды. Алайда Инфантино соңғы шешімге өзі араласпағанын айтты.

«ФИФА-ның Апелляциялық комитеті Бельгия корольдік футбол қауымдастығының өтінішін қарауға жатпайды деп таныды. Себебі Бельгия футбол қауымдастығы бұл іс бойынша екінші тарап болып саналмайды және апелляция беруге заңды құқығы жоқ», делінген ФИФА мәлімдемесінде

Өз кезегінде Бельгия футбол қауымдастығы ФИФА-дан Балогунның ойынға қатысуына қатысты ешқандай ресми шешім де, түсіндірме де алмағанын мәлімдеді. Сондықтан қауымдастық оның матчқа қатысу құқығына күмән келтіруге мәжбүр болғанын айтты.

Апелляциялық комитетті америкалық Нил Эгглстон басқарады. Дегенмен ФИФА оның бұл шешімді қабылдауға қатыспағанын хабарлады.

ФИФА ойыншылардың құқықтарын күшейтетін жаңа ереже қабылдады

Соған қарамастан, Бельгия футбол қауымдастығы АҚШ футбол федерациясына Балогунның есімі матч алдындағы ресми хаттамаға енгізілетін болса, оның ойынға қатысуына қарсылық білдіретінін жеткізді.

«Бұл алдағы барлық мүмкін болатын сәттерде құқықтық әрекеттерге жол ашады», деп мәлімдеді Бельгия футбол қауымдастығы.

Сондай-ақ ұйым осы уақытқа дейін ФИФА-дан шешімнің негіздемесін де, бірнеше рет сұратқан ақпаратты да алмағанын атап өтті.

Дүйсенбі күні бұған дейін Бельгия футбол қауымдастығы ФИФА ақпарат сұратқан хат-хабарларын апелляция ретінде тіркеп, оны техникалық негізде қабылдамай қойғанын хабарлаған.

«ФИФА ережелеріне сәйкес, апелляция қаралуы үшін алдымен шешімнің толық негіздемесі шағымданушы тарапқа жолдануы тиіс», – делінген Бельгия футбол қауымдастығы мәлімдемесінде.

Қауымдастықтың айтуынша, олар тек заңды түсініктеме сұрағанымен, ФИФА бұл өтінішті өз бетінше апелляция ретінде рәсімдеп, кейін оны қарауға жатпайды деп таныған.

Сонымен қатар Бельгия футбол қауымдастығы ФИФА матч алдындағы үйлестіру жиынының таныстырылымынан ойыншыны автоматты түрде шеттету туралы бөлімді алып тастағанын және бұл өзгерістің себебін бірнеше ауызша әрі жазбаша сауалдарға қарамастан түсіндірмегенін мәлімдеді.

«Бұл матчтың нәтижесіне қарамастан, біз болған оқиғаларға қатты алаңдаймыз және алдағы сағаттарда, күндерде және айларда футболдағы әділ бәсеке, этика қағидаттары мен спорттың мүддесін қорғауды жалғастырамыз», деп қорытындылады Бельгия футбол қауымдастығы.