Алматылықтарға үй маңында көлікті тегін қоюға рұқсат берілді

Алматыда жол қозғалысын ұйымдастырудың жаңа қағидалары бекітілді. Құжат тұрғындар үшін үй маңындағы тегін тұрақ, электрсамокаттарға арналған бөлек талаптар, автокөліктерді эвакуациялаудың және шлагбаум орнатудың жаңа ережелерін енгізеді, деп хабарлайды Tengri Auto тілшісі.

Үйден 500 метр қашықтықта тегін тұрақ: не өзгереді?

Алматы мәслихатының кезекті сессиясында депутаттар Жол жүрісі қағидаларымен реттелмеген бөлікте Алматы қаласында жол қозғалысын ұйымдастыру қағидаларын қабылдады.

Негізгі өзгерістердің бірі - көппәтерлі тұрғын үй тұрғындарына тұрғылықты жерінен 500 метр радиуста орналасқан кез келген тұрақта бір автокөлікті тегін қою мүмкіндігі берілді.

"Бұл ретте нақты орын бекітілмейді, бұл тұрғындар мен басқа да қалалықтардың мүдделері арасындағы тепе-теңдікті сақтауға көмектеседі. Жобада меншік иелері, жалға алушылар және олардың отбасы мүшелері үшін бұл құқықты алу тәртібі егжей-тегжейлі сипатталған", – деді жол қозғалысын ұйымдастыру және жолаушылар көлігі басқармасының басшысы Ержан Диханбаев.

Бұдан бөлек, жаңа ережелер:

тұрақтарды коммуналдық ақылы және жеке деп бөледі; олардың жұмысына, жабдықталуына және төлем жасауға бірыңғай талаптар белгілейді; мобильді және стационарлық фото-видео тіркеу кешендері арқылы төлемді бақылауды енгізеді.

Тротуар бойындағы коммуналдық тұрақтар сағат 08:00-ден 20:00-ге дейін минуттық төлеммен жұмыс істейді.

Сонымен қатар жүргізушілер үшін жеңілдік кезеңі қарастырылған:

тротуарлық тұрақтарда жолаушыларды отырғызу және түсіру үшін – 5 минут тегін; алаңдық тұрақтардан шығу үшін – 10 минут.

Бұрынғыдай, ардагерлер, мүгедектігі бар адамдар, көпбалалы аналар, электрмобиль иелері және шұғыл қызметтер төлемнен босатылады.

Бұған дейін "Алматы паркинг" компаниясы ереже жобасын қалалық мәслихат депутаттары қарауы тиіс екенін, содан кейін құжат ресми түрде жарияланатынын хабарлаған болатын. Кейін мамандар жаңа механизмді іске қосу үшін ақпараттық жүйелерді баптайды. Автокөлік иелерінен өтінімдер қабылдау ережелер күшіне енгеннен кейін басталады. Іске қосылатын нақты күн Алматы қалалық мобильділік басқармасы мен "Алматы паркинг" компаниясы ресми ресурстарында қосымша хабарланады.

Тағы оқыңыз: Алматыда үй маңайындағы тұрақтарды тегін пайдалану: жоба қай кезеңде және ол туралы не белгілі?

Google News арқылы жаңалықтарымызды қадағалаңыз

Жазылу