Балқаш ауданының Ақкөл ауылында 5 жылдан бері қылмыс тіркелмеді

Балқаш ауданының Ақкөл ауылында 5 жылдан бері қылмыс тіркелмеді. Оның себебі ауыл дүкендерінде алкоголь өнімдері сатылмайды.

Ақсақалдар бастама көтеріп, ауыл тұрғындары спирт ішімдіктен бас тартыпты. Жалпы Алматы облысында бұған дейін де бірнеше ауыл осындай шешім қабылдаған.  

Балқаш ауданының Ақкөл ауылында спирттік ішімдік сатылмағанына бірнеше жыл болды. Ал мына дүкенде тіпті темекі де сатылмайды. Дүкен қожайыны бұл игілікті істі ары қарай да жалғастыра беретінін айтты.

Ләззат Әлсейітова, сатушы:

- Біздікі азық-түлік дүкені. Темекі, ішімдік сатылмайды. Ішімдік ішпеу жастарға өнеге ғой. Біздің ауылымыз - тыныш ауыл. Балаларымыз да тәртіпті. Қылмыс көрген жоқпыз. Осылай болып қалады деп ойлаймын.

Ішімдіктен бас тартқан елді мекенде бес жыл бойы бірде бір қылмыс тіркелмеген. Бұл «арақсыз ауыл» жобасының сәтті жүзеге асып жатқанын білдірсе керек. Өйткені мұндағы басты мақсат - қоғамдық тәртіпті нығайтып, тұрмыстық зорлық-зомбылық пен құқықбұзушылықтың алдын алу, сонымен қатар жастар арасында зиянды әдеттердің таралуына жол бермеу.

Әлішер Айдын, ауыл тұрғыны:

- Бұл барлық жағынан 100 пайызға дұрыс деп санаймын өз басым. Ауыл адамдары да, ауыл жастары да спортқа жақын. Ішімдіктен, темекіден жастарымыз аулақ.

Айдын Естемесов, учаскелік инспектор:

- Ауыл ақсақалдарымен және ауылдық округтің әкімімен бірге отырыстар болды. Ішімдіксіз ауыл деп қабылданды. Профилактикалық жұмыстар өз уақытында жүргізіліп тұрады.

Ішкі істер министрлігінің мәлімдеуінше, жыл сайын елімізде 10 мыңға жуық қылмыс спирттік ішімдік ішу салдарынан жасалады. Балқаш аудандық полиция бөлімі мен жергілікті әкімдік қызметкерлері есірткі мен алкогольсіз өмір салтын насихаттау жұмыстарын өзге ауылдарда да жүйелі түрде жалғастыруды жоспарлап отыр.

Авторлары: Ардақ Айбарұлы, Аят Дүйсенбаев, Аманжол Жөңкешов