Ішімдіктен бас тартқан ауылда 5 жылдан бері бірде бір қылмыс болмаған
Qazaq24.com, Sputnik.KZ дереккөзінен алынған мәліметтерге сүйене отырып ақпарат жариялайды..
АСТАНА, 19 қазан – Sputnik. Алматы облысында ішімдіктен бас тартқан ауылда бес жылдан бері бірде-бір қылмыс тіркелмеді, деп хабарлайды Sputnik Қазақстан 24.kz арнасына сілтеме жасап.
Балқаш ауданының Ақкөл ауылында бес жыл бұрын ақсақалдардың бастамасымен спирттік ішімдікті сатуға тыйым салынды. Тіпті, темекі де сатылмайды.
"Бұл барлық жағынан 100 пайызға дұрыс деп санаймын өз басым. Ауыл адамдары да, ауыл жастары да спортқа жақын. Ішімдіктен, темекіден жастарымыз аулақ", - дейді ауыл тұрғыны Әлішер Айдын.
Ішімдіктен бас тартқан елді мекенде бес жылдан бері бірде-бір қылмыс тіркелмеген. Оны учаскелік инспектор Айдын Естемесов те растап отыр.
"Ауыл ақсақалдарымен және ауылдық округтің әкімімен бірге отырыстар болды. Ішімдіксіз ауыл деп қабылданды. Профилактикалық жұмыстар өз уақытында жүргізіліп тұрады", - дейді ол.
Ал ішкі істер министрлігінің мәліметіне сәйкес, жыл сайын елімізде 10 мыңға жуық қылмыс мас күйінде жасалады.
Айта кетері, бұған дейін ішкі істер министрі Ержан Сәденов ішімдік сатуға қатысты қосымша шектеулер енгізуді ұсынған болатын.


