Балқашта тозығы жеткен тұрғын үй қорының жаңаруы неге кейінге шегеріліп отыр

Балқаш қаласында 608 тұрғын үй бар, оның бір бөлігі апатты деп танылған немесе апатты жағдайға жақын тұр. Қалалық қызметтердің мәліметі бойынша, қазіргі уақытта алты көпқабатты тұрғын үй ресми түрде апатты деп танылған. Оның төртеуі толықтай, ал екеуі жекелеген құрылымдық элементтерінің жағдайына байланысты осындай мәртебеге ие болды.

Апатты деп танылған үйлердің мекенжайлары:

– Абай көшесі, 90;

– Балқаш көшесі, 24;

– Қараменде би көшесі, 25;

– Сейфуллин көшесі, 15;

– Қараменде би көшесі, 10 (5 кіреберіс);

– Қазыбеков көшесі, 1 (1 кіреберіс).

Сонымен қатар тағы бес көпқабатты тұрғын үй апатты жағдайға жақын деп бағалануда. Олар Мұхамеджанов шағын ауданындағы №13, 6 және 19 үйлер, Ағыбай батыр көшесі, 9 және Желтоқсан көшесі, 1 мекенжайындағы үйлер.

2025 жылы жүргізілген ағымдағы жөндеу жұмыстары нәтижесінде Сейфуллин көшесі, 33 және Бөкейханов көшесі, 1 мекенжайындағы үйлер апатты жағдай алдындағы нысандар тізімінен шығарылды.

Қазіргі уақытта ғимараттардың техникалық жағдайы бойынша жаңа қорытындылар алынбаған және қайта тексеруден өткен үйлердің толық тізімі қалыптаспаған. Дегенмен, жақын арада тексерілетін нысандардың алдын ала тізімі анықталды. Оған Бауыржан Мусиндер көшесі, 12; Балқаш-1 станциясы, 32; Абай көшесі, 47 мекенжайларындағы үйлер кіреді.

Балқаш қаласы әкімдігінің хабарлауынша, 2024-2029 жылдарға арналған тұрғын үй қорын реновациялау бағдарламасы бекітілген. Бағдарлама 2024 жылғы 20 маусымдағы №29/04 әкімдік қаулысымен қабылданып, тұрғын үй қорын жаңартудың негізгі бағыттарын белгілейді.

Алайда, бағдарламаның іске асуы құрылыс компаниялары мен жеке инвесторлардың жетіспеушілігіне байланысты қиындықтарға тап болып отыр. Әкімдік өкілдері құрылыс салушылар мен инвесторлардың болмауы басты кедергі екенін атап өтті.

Қала билігі тұрғын үйді жаңарту қарқыны инвесторлардың қатысуына тәуелді екенін мойындайды. Қазіргі уақытта инвесторларды тарту және әлеуетті серіктестерді іздеу жұмыстары жүргізіліп жатыр. 

Апатты үйлерде тұратын және жалғыз баспанасы сол үйлер болып табылатын меншік иелері мемлекеттік қолдауға үміт арта алады. Мұқтаж азаматтар ретінде есепке алынған жағдайда, олар мемлекеттік тұрғын үй қорынан кейіннен сатып алу құқығымен жалға берілетін баспанамен қамтамасыз етіледі. 

Алдағы 3-5 жылда әкімдік негізгі күш-жігерін инвесторларды тартуға бағыттап, бұл арқылы ауқымды реновацияны бастауға ниетті. Инвесторлар тартылғанға дейін тұрғын үй қорын сақтау мақсатында шатырлар мен қасбеттерді жөндеу, ғимараттарға бірыңғай сәулеттік келбет беру сияқты шаралар жүзеге асырылады. 

Осылайша, Балқаш қаласында тұрғын үй қорын жаңарту бағдарламасы бекітілгенімен, оның жүзеге асуы үйлердің техникалық жағдайы мен қаланың инвестициялық тартымдылығына байланысты болып отыр. 

Осыған дейін Қоғамдық кеңес отырысында Астана қаласында реновацияға жататын тұрғын үй нысандарының тізбесін бекіту мәселесі қаралғаны жайлы хабарлаған болатынбыз.