БАҚ: Марокко Газада әскери күштерін орналастыруды жоспарлап отыр

Марокко АҚШ президенті Дональд Трамптың Газадағы жоспары аясында құрылған Халықаралық тұрақтылық күштері (ISF) құрамында өз әскери қызметкерлерін орналастыруды жоспарлап отыр, деп хабарлайды АА.

Израильдің мемлекеттік KAN телеарнасының хабарлауынша, Марокко ISF құрамында Газада әскери күштерін жіберуді жоспарлаған алғашқы араб елі болуы мүмкін.

Сонымен қатар, Грекия мен Албания да АҚШ ресми өкілдерімен жоғары деңгейде келіссөздер жүргізіп жатыр.

KAN арнасы хабарлағандай, АҚШ Израильдің Кирьят-Гат қаласында соғыс қимылдарын тоқтату келісімін бақылау үшін құрған әскери базадағы өкілдер Израиль армиясымен байланыс орнатып, Газаның оңтүстігінде ISF-тің жаңа базасын салу мәселесін талқылауда. Құрылыс жұмыстары ай соңында басталмақ.

Индонезия бұған дейін шамамен 8 мың әскери қызметкерді ISF құрамында Газада орналастыруға дайын екенін, олар маусым айының соңына дейін дайын болатынын мәлімдеген.

Газадағы халықаралық күштердің қолбасшылығын АҚШ-тың генерал-майоры Джаспер Джефферс атқарады. Бұған қоса, Индонезия ISF құрамында әскери күштерін жіберетін алғашқы мемлекет болады деген ақпарат тараған. Индонезиялық әскерилер Рафах пен Хан-Юнус қалаларының арасындағы аймақта орналастырылмақ.

Бүгін, 12:48