Барлығы 72 долларға Қазақстан Ресейден автомобиль сатып алуды дерлік тоқтатты

Қазақстан мен Ресей арасындағы автомобиль саудасы күрт қысқарды. Көліктер екі бағытта да сатылмайтын болған: Қазақстан ресейлік автокөліктер импортын да, көрші елге көлік экспортын да айтарлықтай азайтты, деп хабарлайды Tengri Auto.

Ресейлік көліктерді Қазақстанға жеткізу тоқтаған

Әсіресе Ресейден жеңіл автомобильдер импортының азайғаны байқалады. Ұлттық статистика бюросының мәліметінше, 2026 жылғы маусымда ақшалай түрдегі жеткізілім көлемі небәрі 72 доллар болған.

Салыстырмалы түрде: қаңтарда ресейлік жеңіл автомобильдер импорты шамамен 1 миллион долларға, ақпан мен наурызда ай сайын шамамен 1,5 миллион долларға бағаланған. Сәуірде бұл көрсеткіш 5,5 миллион долларға жетті.

Ал мамырда жеткізілім көлемі 111,4 мың долларға дейін құлдырап, маусымда нөлге теңелді.

Бұған басты себептердің бірі - утильалымды есептеу ережесінің өзгеруі. 8 мамырдан бастап Қазақстанда Ресей мен Беларусьтен келетін автомобильдер үшін жаңа коэффициенттер қолданыла бастады.

Қозғалтқыш көлемі 1-ден 2 литрге дейінгі жеңіл автомобиль үшін базалық мөлшерлеме шамамен 216 мың теңге болады. Бұл ретте басқа елдердің көпшілігінен келетін көліктер үшін 3,5 коэффициенті, ал Ресей мен Беларусь автомобильдері үшін 136 коэффициенті қолданылады.

Нәтижесінде мұндай автомобиль үшін утильалым 29,4 миллион теңгеге дейін жетуі мүмкін, бұл көбіне көліктің өз құнынан асып түседі. Ресейден автомобиль әкелудің экономикалық мәні жойылды.

Қазақстаннан Ресейге ағылатын автомобильдер легі де едәуір азайды.

Бұл бағытта басқа шектеулер әрекет етеді. Атап айтқанда, Қазақстанға жеңілдік шарттарымен әкелінген электрмобильдерді Ресей азаматтарына және онда тұрақты тұратын адамдарға беруге болмайды. Шектеу үш жыл күшінде болады.

Бұдан бөлек, 2025 жылдың ағында Ресейдің Федералдық кеден қызметі Қазақстаннан әкелінетін автомобильдерге бақылауды күшейткен болатын.

Кедендік төлемдер мен утилталымның дұрыс есептелуіне ерекше назар аударылды. Тексеріс Қазақстанда шығарылған Kia, Hyundai және Skoda көліктерін де қамтыды.

Кейбір жағдайда Қазақстаннан әкелінген көліктердің ресейлік иелеріне миллиондаған рубль болатын қосымша кедендік төлемдер есептелген.

Осылайша, екі ел арасындағы көлік ағыны екі тараптан да шектеулерге тап болды.

Утильалымның жоғарылауына байланысты ресейлік автокөліктерді Қазақстанға әкелу тым қымбатқа түсетін болды. Ал кері бағытта көліктердің жекелеген санаттарына қойылған шектеу, күшейтілген кедендік бақылау және Ресейдегі қосымша төлемдер қаупі салдарынан Қазақстаннан көлік сатып алудың тиімділігі азайды.

Google News арқылы жаңалықтарымызды қадағалаңыз