Бейнеу ауданында тағы төрт ауыл Алкогольсіз ауыл мәртебесіне ие болды

Бұл бастама «Айқын нәтиже» жобасы аясында аудан прокуратурасының ұсынысымен Есет, Төлеп, Тұрыш және Тәжен ауылдарында жүзеге асырылды.

Аталған елді мекендерде 2,6 мыңнан астам тұрғын бар. Олар өз ауылдарында қауіпсіз әрі жайлы орта қалыптастыруға бағытталған бастаманы қолдап, қатысуға ниет білдірді.

Жобаға қосылған ауылдарда тұрғындар мен кәсіпкерлер алкоголь өнімдерін сатудан және тұтынудан ерікті түрде бас тартты. Бұл қадам қауіпті жағдайлардың алдын алып, қоғамдағы қауіпсіздік деңгейін арттыруға бағытталған.

Инициатива қоғамдық тәртіпті күшейтуге, құқық бұзушылықтар мен тұрмыстық зорлық‑зомбылықтың, сондай‑ақ масаң күйде жасалатын қылмыстардың азаюына ықпал етуге бағытталған. Сонымен бірге, ауылдарда салауатты өмір салты мәдениетін қалыптастыруға серпін береді.

Осындай жобалардың жүзеге асуы тұрғындардың өз ауылдарындағы тәртіп пен қауіпсіздікке деген жауапкершілігін күшейтеді.

Бүгін, 18:58