Елімізде төрт мың ауыл мектебі жаңғыртылды

Елімізде кейінгі үш жылда 4 мыңнан астам ауыл мектебінің материалдық-техникалық базасы жаңартылды. Екі мыңнан астам жаратылыстану-математика бағытындағы заманауи зертхана ашылды.

Биыл мыңнан астам ауыл мектебі күрделі жөндеуден өтті. Бұл – Мемлекет басшысының қала мен ауыл мектептерінің білім сапасындағы алшақтығын жою туралы тапсырмасын іске асыру аясында қолға алынған шаралар. 

Айта кетерлігі, 77 мектеп сыбайлас жемқорлардан қайтарылған қаражат есебінен салынды. Құрылысы аяқталған бұл мектептердің басым бөлігі демографиясы жоғары Алматы, Түркістан, Қызылорда, Жамбыл облыстары мен Астана қаласында орналасқан.

Елімізде жыл сайын мыңнан астам ауыл мектебі жаңғыртылып жатыр. Биыл елді мекендерде күрделі жөндеуден өткен білім ошақтарында 1176 заманауи пәндік кабинет ашылды. Сонымен қатар ел бойынша 1300 мектеп реновация бағдарламасына енгізіліп, ғимараттары жаңартылып жатыр. Осы жылы 190 мың орындық 245 мектеп қамтылды. Онда кітапхана, асхана, спорт залдары жөнделіп, қауіпсіздік жүйелері реттелді.

217 «Келешек мектебінің» 84-і ауылда салынды

Ел Президентінің бастамасымен жүзеге асып жатқан «Келешек мектептері» ұлттық жобасы аясында 460 мың орынға арналған 217 жаңа мектеп салынып жатыр. Бұл инновациялық білім орындарының көлемі типтік мектептерден 15-20%-ға кең. Техникалық жабдықталу деңгейі төрт есе жоғары. Ерекше атап өтетін жағдай, осы 217 мектептің 84-і ауыл-аймақтарда бой көтеруде.

Гүлнұр Бақытжанова, мектеп директоры:

- Бұл мектепте білім алып қана қоймай, шығармашылықтарын дамытуына толығымен жағдай жасаған деп айта аламыз. Себебі әрбір шеберхананың өзі балалардың болашақ мамандықтарын таңдауға, ғылыми жұмыстар жүргізуге, әртүрлі жобалар жасауға үлкен мүмкіндік береді.

Өңірлерге 5400 педагог қажет

Бүгінде өңірлерге 5400-ден аса педагог қажет. Әсіресе ауыл мектептеріне мұғалім жетіспейді. Тапшылықтың 54%-ы елді-мекендерге тиесілі. Мысалы, ел бойынша мыңнан аса математика пәнінің мұғалімі, 750 бастауыш сынып жетекшісі қажет. Сондай-ақ физика, химия, орыс тілі пәні мұғалімдеріне қажеттілік басым.

Сапалы білім – табысты ұлт

Жаңа оқу жылынан бастап оқу процесіне жасанды интеллект енгізіле бастады. Енді 1-4 сыныптар «Цифрлық сауаттылық және жасанды интеллект» пәнін, 5-11 сыныптар «Информатика және жасанды интеллект» пәнін оқып жатыр. Сонымен қатар биыл балалар құқығын қорғауды күшейтетін алты негізгі заң күшіне еніп, буллинг пен кибербуллинг үшін жауапкершілік артты. 1 қыркүйектен бастап білім ошақтарында антибуллинг бағдарламасы іске қосылды. Жаңа оқу жылында жеке қауіпсіздік сабақтары өзектендірілді.

Ерболат Шайланов, «Өркен» балалардың әл-ауқатын арттыру ҰҒИ зертханасының басшысы:

- Жеке қауіпсіздік сабақтарының негізгі мақсаты білім алушылардың жеке қауіпсіздік мәдениетін қалыптастыру. Еліміз бойынша қазір 1,4 млн-нан астам сабақтар өткізілді. Қауіпсіздік сабақтарын балаларды зорлық-зомбылықтан қорғау, олардың құқықтары мен саламаттығын қамтамасыз ету жөніндегі кешенді жоспар аясында әзірленді.

Әйгерім Нұғманова, мектеп директорының тәрбие ісі жөніндегі орынбасары:

- «Адал азамат» біртұтас тәрбие бағдарламасы бойынша 2024 жылдан бастап қауіпсіздік сабақтары жүзеге асырылуда. 2025 жылы сабақтардың мазмұны жаңартылып, қосымша әдістемелік материалдар мен бейнероликтермен  толықтырылды.