Беларусь БАҚ тарының YouTube каналдары бұғатталды

АСТАНА, 7 сәуір – Sputnik. ТМД бас хатшысы Сергей Лебедев Беларусьтің ірі бұқаралық ақпарат құралдары – Белта ақпарат агенттігі, ОНТ және СТВ телеарналары каналдарының YouTube-тен алынып, бұғатталуына алаңдаушылық білдірді, деп хабарлайды РИА Новости.

3 сәуірде видеохостинг әкімшілігі Белта, ОНТ және СТВ мемлекеттік YouTube каналдарын жойды. Платформаға ие америкалық Google компаниясы ешқандай түсіндірме бермеді.

Бас хатшы бұл жағдайды журналистердің құқығын шектеу деп сипаттады.

"Миллиондаған қаралымы бар Беларусь Республикасының жетекші және тиімді жұмыс істейтін БАҚ-тарын YouTube-те бұғаттау – журналистердің құқығын шектеудің нақты мысалы", – деді Лебедев Белта агенттігіне.

Ол сондай-ақ, ТМД штаб-пәтері Минскіде орналасқанын және ТМД күн тәртібі республикалық БАҚ-та сапалы, жедел әрі теңгерімді түрде жарияланатынын атап өтті.

"Енді Одақ ішінде және одан тыс оқырмандар мен көрермендер болып жатқан оқиғалардан хабардар болу мүмкіндігінен айырылды. Біз Беларусь медиасымен, соның ішінде Белта агенттігімен, ОНТ және СТВ телеарналарының журналистерімен ұзақ жылдар бойы тығыз ынтымақтастықта болдық. Олар ТМД-да болып жатқан оқиғаларды кәсіби және теңгерімді түрде жеткізеді", – деді ТМД бас хатшысы.

Лебедевтің айтуынша, Белта – ТМД мемлекеттік ақпарат агенттіктерінің басшылары кеңесінің белсенді мүшесі, ол 30 жылдан астам жұмыс істеп келеді және одақ аясындағы іс-шараларға ақпараттық қолдау жасайды.

Бас хатшы сондай-ақ пікір білдіру еркіндігі мен ашық ақпаратқа қол жеткізу қазіргі заманда ең маңызды құндылық екенін атап өтті.

Бұған дейін Беларусь Сыртқы істер министрлігі де жауап берген.

"Беларусь болған оқиғаның мән-жайын мұқият зерделеп жатыр. Біз ұлттық заңнама мен халықаралық құқық шеңберінде қолжетімді барлық құралды пайдаланып, тиісті түрде жауап беру құқығын сақтаймыз", – деп хабарлады сыртқы саяси ведомствоның баспасөз қызметі.

Белта агенттігі каналдардың санкциялар салдарынан жойылғанын, бірақ агенттіктің өзіне санкцияларға ілікпегенін атап өтті. Сонымен қатар, Белта мен ОНТ ресми жойылған каналдардың орнына жалған YouTube каналдар пайда болғанын ескертті.

"Егер сіз осындай атау берілген (Белта – Sputnik) каналға тап болсаңыз, бұл клон екенін біліңіз. Сақ болыңыз және жалған аккаунттарға сенбеңіз", – деп оқырмандарға үндеу тастады Белта агенттігі.

ОНТ телеарнасы да өз сайтында "желіде жалған каналдар пайда болды" деп хабарлады.