Ресей билігі WhatsApp, YouTube және ірі БАҚ ты DNS деңгейінде бұғаттады

Ресейдегі танымал ресурстардың оннан астам домені «суверенды Рунет» заңы аясында құрылған Ұлттық домендік есімдер жүйесінен (НСДИ) өшірілді, деп хабарлайды Arasha.kz.

Сарапшылар жүргізген тексеріс нәтижесінде 13 ірі ресурстың деректері жүйеден жойылғаны белгілі болды. Олардың қатарында «Настоящее Время», «Радио Свобода», BBC News, Deutsche Welle сынды ақпараттық сайттармен қатар, WhatsApp, Facebook, YouTube сервистері және Tor браузері бар.

Енді ресейлік қолданушылар бұл ресурстарға VPN көмегінсіз тікелей кіре алмайды. Желілік жабдықтар сайт атауын оның IP-мекенжайымен байланыстыра алмағандықтан, жүйе DNS_PROBE_FINISHED_NXDOMAIN қателігін шығарады, бұл домендік есімнің мүлдем жоқ екенін білдіреді. 

«На связи» жобасының түсіндіруінше, реттеуші органдар бұғаттаудың жаңа әдісін — DNS жазбаларын өшіруді (DNS tampering) белсенді қолдана бастаған. Бұған дейін мұндай әдіс 2024 жылы Discord пен Signal сервистеріне қатысты нүктелі түрде қолданылса, бүгінде бұл үдеріс алғаш рет жаппай сипат алып отыр.

Мұндай жағдайда қолданушылар DNS баптауларын өзгерту арқылы сайттарға кіру мүмкіндігін уақытша қалпына келтіре алады. Алайда сарапшылар егер елде тек ұлттық DNS сервисі ғана қалдырылса, бұғаттаудан айналып өтудің әдеттегі тәсілдері жұмыс істемей қалатынын ескертеді. 

Ондайда қолданушыларға интернет-трафикті қорғайтын қосымша құралдарды іздеуге тура келеді. Әзірге Ресей билігі немесе НСДИ өкілдері бұл жағдайға қатысты ешқандай ресми мәлімдеме жасаған жоқ. Сонымен қатар, мақала соңында IT-маман Леонид Юлдашев Ресейдегі Telegram-ның бұғатталуы мен Иранның осы саладағы тәжірибесіне тоқталып өткен.