Ресей WhatsApp ты бұғаттап, Max мессенджерін енгізуде

Telegram-ға шектеу енгізілгеннен кейін Ресей WhatsApp-ты бұғаттап, мемлекеттік Max мессенджерін алға жылжытады, деп хабарлайды Евронью́с.

Ресей интернет кеңістігін толық бақылауға алу мақсатында жаңа қадам жасады. Telegram-ға қолжетімділікті шектегеннен кейін Кремль WhatsApp-ты «толық бұғаттауды» көздеп отыр. Бұл туралы компания ресми мәлімдеме жасады.

Сонымен қатар, билік мемлекеттік бақылаудағы Max мессенджерін енгізуді жалғастыруда. WhatsApp өз мәлімдемесінде Max-ты «мемлекеттік тыңшылық қосымшасы» деп атады.

Meta компаниясы: «100 миллионнан астам қолданушыны қауіпсіз әрі жеке байланыстан айыру — адамдардың қауіпсіздігін төмендететін қадам» деп мәлімдеді.

Facebook пен Instagram Ресейде ресми түрде тыйым салынған, тек VPN арқылы қолжетімді.

Кремльдің баспасөз хатшысы Дмитрий Песков WhatsApp-тың Ресей заңдарын сақтамағанын айтып, Meta-ны келіссөзге шақырды.

Telegram-ға да шектеу қойылды. Павел Дуров мұны «азаматтарды мемлекеттік бақылаудағы қосымшаға мәжбүрлеу әрекеті» деп атады. Ол жағдайды Ирандағы 8 жыл бұрынғы сәтсіз тәжірибемен салыстырды.

2025 жылдан бастап Max қосымшасы Ресейде сатылатын барлық жаңа құрылғыларға алдын ала орнатылуы тиіс. Мемлекеттік қызметкерлер, мұғалімдер және студенттер оны міндетті түрде қолдануға міндеттелген.

2026 жылдың 1 қаңтарынан бастап барлық интернет-сервистер пайдаланушылардың хабарламаларын үш жыл сақтап, қажет болған жағдайда арнайы қызметтерге беруге міндеттелді. Бұл талап аудио, видео, мәтін және метадеректерге де қатысты, тіпті өшірілген хабарламаларға да.

Ресей халықаралық мессенджерлерді шектеп, өз бақылауындағы Max қосымшасын енгізу арқылы интернетті қатаң қадағалауға көшті. Бұл шаралар құқық қорғаушылар тарапынан цензура мен жаппай бақылау ретінде сынға алынуда.

Бүгін, 14:31