Бензин бағасын биржа реттейді

Жанармай деген кейде қасқалдақтың қанындай қат табылмай кететіні бар.

Біздің елдің мұнай өңдеуге көңіл бөлуі содан. Бұл бір.  Екіншіден, сұраныс артып келеді. Тағы бір мәселе жанармай бізде арзан болғанмен, өзге елдерде қымбат. Іргедегі Өзбекстанда Аи-92 бензині қазір 11 мың 200 сум, яғни 495 теңге. Тіпті мұндағы жүргізушілер жаппай электр көлікке отыра бастаған. Кейінгі бір жылда көрші елге Қытайдан 600 мыңға жуық осындай машиналар импортталған.  

Дулат Нуркин, тілші:
- Өзбекстанда Аи-80 бензині жүргізушілер арасында жоғары сұранысқа ие. Сапасы төмен болғанымен, бағасы қолжетімді. Жанармай бекеттерінде ол 9100 сум, яғни біздің ақшаға шаққанда 402 теңгеден сатылады. Айта кетерлігі бұл жақта жанармай бекеттері биржаға өздері қатысып, оларға құнды белгілеу құзыреті берілген. Мемлекет баға саясатына араласпайды. Елдің энергетика министрлігі 2020 жылы бензинді еркін саудаға жіберген. Әлбетте жанармай бекеттері ойына келген бағаны қоя алмайды. Өйткені бәсекелестік бар. Дизельдің құнына да тоқталғым келіп тұр. Ташкентте оның литрі  522 теңгеден басталып, кейбір бекеттерде 555 теңге көлемінде саудаланады.

Айта кету керек, Өзбекстанда Аи-80 бензині жыл соңына дейін сатылымнан шығарылады. Ала шапанды ағайындар еуро-4 экологиялық стандартына өту үшін осындай қадамға барып отыр. О баста, Еуро-4 стандартына көрші ел 2028 жылы ауысуы керекті. Алайда елдегі нашар экологиялық ахуал мен жасыл экономикаға берілген басымдық бағдарламаны жеделдетуге мәжбүр етті. Егер Аи-80 сатылымнан шығарылса, жүргізушілердің қалтасына салмақ түсетіні анық. Себебі 1 литр бензинге 1 доллар төлеуге екінің бірінің шамасы жоқ. Елде көп көлік газбен жүретінін де ескеру керек. Салыстырмалы түрде қарасақ, метанның да бағасы анау айтқандай арзан емес. Литрі 157 теңге шамасында саудаланады. Нарықтағы бағаның тұрақсыздығына байланысты мұндағы жұрт бірте-бірте электр көліктерді тізгіндеуге көшіп жатыр. Көптігі сонша көшелерде қытай машиналарынан көз сүрінеді.