BI Group Наталия Сац атындағы театрды жөндеп, ұжымға 25 миллион теңге сыйға тартты

Компания тарихи ғимаратты жаңартып, камералық сахнасы бар жаңа корпус салып, театр маңындағы аумақты абаттандырды. Сонымен қатар BI Group театрдың шығармашылық дамуына 25 миллион теңге көлемінде қаражат бөлді.

BI Group өкілдері 25 миллион теңгенің сертификатын театр ұжымына тапсырды. Бұл қолдау жаңартылған театр кешенінде жаңа қойылымдар мен шығармашылық жобаларды жүзеге асыруға, сондай-ақ балалар мен жастарға арналған мәдени бастамаларды дамытуға мүмкіндік береді. Көрермендерге қайта есік ашқаннан кейін театр, білім беру және мәдени қызметті біріктіретін заманауи өнер орталығы ретінде дамымақ.

«Біз BI Group-ке тек театрымыздың жаңарғаны үшін ғана емес, сондай-ақ театрдың шығармашылық дамуына қолдау көрсеткені үшін ризашылық білдіреміз. Заманауи алаң жаңа қойылымдар, шығармашылық жобалар, тәжірибелер мен балалар мен жастарға арналған тың бастамаларға жол ашуы қажет. Сондықтан компанияның қолдауы біз үшін – театрдың жаңа өміріне, оның шығармашылығы мен жаңа мүмкіндіктеріне қосқан үлес. Қайта жөндеу жұмысынан кейін Сац театры тек қойылымға келетін жер емес, көрме, дәрістер, шеберлік сыныптары, шығармашылық кездесулер мен білім беру бағдарламалары ұйымдастырылатын орын болуы керек», – деді Н.Сац театрының директоры Олег Гостев.

Кең көлемді қайта жөндеу жұмысы аясында тек театрдың тарихи ғимараты ғана жаңартылып қойған жоқ, сонымен қатар жаңа инфрақұрылым тартылды. Енді кешеннің жалпы ауданы 25 мың шаршы метрді қамтымақ. Оның 10,56 мың шаршы метрі жанынан салынған бес қабатты корпусқа тиесілі.

Жоба командасы театр мұрасын сақтауға ерекше көңіл аударды. Қабырғалар мен едендердің мәрмәр жабындары, мозаикалық композициялар мен көркемсурет элементтері реставрацияланды. Жоғалып кеткен интерьерлік үлгілер, мұрағат материалдары мен бастапқы сызбалар бойынша қалыпқа келтірілді.

«Біз үшін ғимаратты жай ғана жаңғырту емес, оның өзіндік болмысы мен тарихын айқындайтын ерекшеліктерін сақтап қалу маңызды болды. Сонымен қатар, театр үшін мүлде жаңа инфрақұрылым жасақтадық. Нәтижесінде, тарихи ғимарат пен жаңа корпус біртұтас кешенге айналды: бір бөлігі Сац театрының тарихи мұрасын сақтаса, екіншісі оның одан әрі дамуына жаңа мүмкіндіктер береді», – деді BI Group жобасының жетекшісі Асқар Сағандықов.

Жаңа корпустың негізгі нысаны – 220 көрерменге дейін қабылдай алатын, конфигурациясы өзгертілетін Black Box камералық сахнасы. Дәстүрлі театр залынан ерекшелігі – бұл кеңістіктің қойылым немесе іс-шара форматына қарай құрылымын өзгертуге мүмкіндік бар.

Реконструкциядан кейін кешен тек қойылымдар үшін ғана пайдаланылмайды. Жаңа кеңістік көрмелер, дәрістер, шеберлік сыныптарын, шығармашылық кездесулер мен білім беру бағдарламаларын ұйымдастыруға есептелген. Театр маңындағы аумақ та түрленді: абаттандырылған отбасылық қоғамдық орын, демалыс аймақтары мен балаларға арналған су алаңы пайда болды.

Реконструкцияның аяқталуы Сац театрының тарихындағы жаңа кезеңнің бастауы болмақ. BI Group оған арналған заманауи инфрақұрылым салуға көмектесті. Ал қосымша қолдау ретінде берілген 25 миллион теңге өнер мен театрдың жаңа жобаларын әрі қарай дамытуға мүмкіндік береді.