Алматыкітап 1000 білім беру станциясын сыйға тартты

24.KZ парақшасынан алынған деректерге сүйене отырып, Qazaq24.com жаңалық жариялайды..

«Алматыкітап» баспасы Жаңа жыл мерекесі қарсаңында қайырымдылық жобасын қолға алды.

Еліміздің шалғайдағы мектептеріне 1 мың білім беру станциясын сыйға тартты. Заманауи цифрлық ресурстармен және жасанды интеллект құралдарымен жабдықталған станция интернетсіз де жұмыс істей береді. Жаңа құрылғыға күнделікті оқу барысында қажет оқулықтар мен басқа да материалдар енгізілген.

Жаңа жыл қарсаңында «Алматыкітап» баспасы еліміздің 20 өңіріндегі шалғай ауылдардың мектептеріне бір мың білім беру станциясын табыс етті. Қайырымдылық іс-шарасы баспа құрылтайшысы Элеонора Баталованың бастамасымен жүзеге асты. Әрқайсының құны 400 мың теңге болатын станциялар интернетсіз жұмыс істейді және жасанды интеллект құралдарымен жабдықталған.

Төлеуіш Қалымқызы, Ақмола облысы Бұлақсай ауылындағы №2 орта мектеп директоры:

- Барлық көркем шығарма, тарихи шығарма, зерттеу жұмыстары, оқушыларды Ұлттық бірыңғай тестілеуге дайындауда ресурстарды тауып аламыз. Сондықтан бұл кез келген ауылдық жердегі, әсіресе шағын жинақ мектептері – біздер үшін ауадай қажет.

Айнұр Қасымханқызы, К. Мыңбаев атындағы №59 мектеп-лицейдің информатика пәні мұғалімі:

- Әрбір балада 7 немесе 10 оқулықты бірге көтеріп жүргенге ыңғайсыз. Яғни «Алматыкітап» баспасы осы платформаны ойлап тапқан кезде оқушыға да, мұғалімге де, ата-анаға да жеңілдігін көрсетіп тұр.

Иә, станцияда қазақ және орыс тілдеріндегі 395 оқулық пен көркем әдебиет, бейнематериалдар, интерактивті тапсырмалар мен тесттер бар. Сондай-ақ «Qamqor» интеллектуалды көмекшісі мұғалімдерге сабақ жоспарларын әзірлеуге, оқу барысын тиімді ұйымдастыруға көмектеседі.

Гауһар Саймасаева, «Алматыкітап» баспасының президенті:

- Біздің станциялар мұғалімдерге, балаларға жақсы көмекші болады. Былтыр «Оқуға құштар ұлтты құрайық» деп Президент үндеу тастады. Сол біздің «Алматыкітап» баспасының Президентіміздің бастамасына осындай жауап.

«Алматыкітап» баспасы бұл жобаны елдегі білім ордаларын заманауи құралдармен жабдықтау мақсатында ұйымдастырып отыр.

Авторлары: Нұрқанат Қанапия, Марат Диханбаев

Жағдайды бақылауды жалғастырыңыз, Qazaq24.com әрқашан ең жаңа жаңалықтарды ұсынады.