Трамп Украинаның шабуылдары салдарынан Ресейдің мұнай өңдеу саласына бақылауды жоғалтқанын мәлімдеді

АҚШ президенті Дональд Трамп Ресейдің мұнай өңдеу зауыттарына (МӨЗ) жасалған соққылар төңірегіндегі жағдайға және олардың әлемдік отын нарығына әсеріне қатысты пікір білдірді, деп хабарлайды Би-би-си.

Америкалық көшбасшының айтуынша, әскери әрекеттер салалық инфрақұрылым жұмысында айтарлықтай іркілістерге алып келді.

«Өкінішке қарай, Ресей Украинамен соғыстың салдарынан дизель отынын өндіру саласына бақылауды жоғалтып алды. Олардың көптеген МӨЗ-і жарылып, кем дегенде уақытша істен шықты. Украинамен арадағы бұл ақылға сыйымсыз әрі шексіз соғысты тоқтату қажет. Басым бөлігі сарбаздардан тұратын 25 мың адам ай сайын қаза тауып жатқанда, бүкіл әлем зардап шегуде», — деп жазды Трамп Truth Social әлеуметтік желісінде.

АҚШ президентінің бұл мәлімдемесі дизель отынының әлемдік бағасының өсуі мен ұшқышсыз аппараттардың ауқымды шабуылдары аясында жарияланды. Қарсаңда Мәскеуде ҰҰА-ның ең ауқымды шабуылы туралы хабарланды: қала билігінің мәліметінше, РФ елордасына жақындаған кезде 450 дрон атып түсірілген, алайда олардың бір бөлігі Мәскеу МӨЗ-іне тиіп, соның салдарынан өрт шыққан.

Axios басылымы өз дереккөздеріне сілтеме жасап жазғандай, МӨЗ-ге жасалған соққылар тақырыбы Трамптың Украина президенті Владимир Зеленскиймен соңғы телефон арқылы сөйлесуі кезіндегі басты мәселеге айналды.

«Трамп бұл соққылар дизель отынының әлемдік бағасының өсуіне алып келетінін баса айтып, ресейлік МӨЗ-дерге жасалатын шабуылдарды тоқтатуды бірнеше рет өтінді. Әңгіме барысында "дизель" сөзі бірнеше мәрте айтылды», — деп хабарлады басылымның дереккөзі.

Бұған дейін де АҚШ президенті Киевті тактиканы өзгертуге және шабуылдар үшін басқа нысандарды таңдауға шақырып, отын инфрақұрылымының зақымдануы жаһандық экономикаға зиян тигізетінін көрсеткен болатын. Сейсенбіде Нью-Йоркте Дональд Трамп пен Владимир Зеленскийдің жеке кездесуі жоспарланған.

Кеше, 17:52