Бірнеше несиесі бар қазақстандықтарға қарызды өтеудің жаңа тәсілі ұсынылды

1 шілдеден бастап Қазақстанда бірнеше банк пен микроқаржы ұйымында мерзімі өткен берешегі бар азаматтарға көмектесуге арналған жаңа цифрлық платформа іске қосылды. Енді борышкерлер әр кредитормен жеке-жеке келіссөз жүргізіп уақыт жоғалтпай, барлық төлемді бір төлемге біріктіре алады, деп хабарлайды Tengrinews.kz Қаржы нарығын реттеу және дамыту агенттігіне (ҚНРДА) сілтеме жасап.

1 шілдеден бастап Қазақстанда бірнеше банк пен микроқаржы ұйымында мерзімі өткен берешегі бар азаматтарға көмектесуге арналған жаңа цифрлық платформа іске қосылды. Енді борышкерлер әр кредитормен жеке-жеке келіссөз жүргізіп уақыт жоғалтпай, барлық төлемді бір төлемге біріктіре алады, деп хабарлайды Tengrinews.kz Қаржы нарығын реттеу және дамыту агенттігіне (ҚНРДА) сілтеме жасап.

Жаңа құралды ҚНРДА Бірінші кредиттік бюромен бірлесіп, банк және микроқаржы омбудсмандеры негізінде әзірледі. Бұл тетік бойынша қарыз алушы әрбір қаржы ұйымына жеке жүгінбей, бір ғана өтініш бере алады. Оның негізінде 5 жылға дейінгі мерзімге ортақ төлем кестесі (ал халықтың әлеуметтік осал топтары үшін - 7 жылға дейін) жасалады. Келісімшарт күшінде болған уақытта қарызды өндіріп алу шаралары тоқтатыла тұрады.

Жаңа мүмкіндікті кімдер пайдалана алады?

Келесі үш критерийге бірдей сәйкес келетін азаматтар Finkelisim.kz платформасында өтінім бере алады:

бір мезгілде екі немесе одан да көп кредитор алдында (банктер, МҚҰ немесе коллекторлар) 90 күн және одан көп мерзімге кешіктірілген берешегі барлар; қарызының жалпы сомасы 150-ден 1600 АЕК-ке дейін (2026 жылы 648 750-ден 6 920 000 теңгеге дейін) болатындар; бұл несиелер бойынша сот шешімі, нотариустың атқарушылық жазбасы немесе мәжбүрлеп өндіріп алудың басқа да шаралары әлі қабылданбаған жағдайда.

Маңызды шектеу: платформа тек кепілсіз тұтынушылық қарыздар үшін құрылған. Егер сізде ипотека, автонесие, бизнеске арналған қарыздар, алаяқтар рәсімдеген несиелер болса немесе банкроттық рәсімінен өтіп жатсаңыз, қарыздарды біріктіру мен қайта құрылымдау мүмкін емес.

ҚАЗІР ТАЛҚЫЛАНЫП ЖАТЫР

“Қазақстан тарихының жаңа дәуірі басталады“: Тоқаев халыққа үндеу жасады

Бүгін 08:02 1

Жаңа төлемдер қандай болады?

Ай сайынғы төлем мөлшері мен мерзімі қарыздың жалпы сомасына қарай автоматты түрде есептеледі.

Жалпы негіздегі қарыз алушылар үшін: мысалы, жалпы қарызы 1 миллион теңгеге дейін болса, ең жоғарғы төлем 1 жыл бойы айына 84 мың теңге болады. Ал қарыз шекті мөлшерде (5–7 миллион теңге) болса, 5 жыл бойы айына 117 мың теңгеге дейін төлеуге тура келеді.

Әлеуметтік жағынан осал азаматтар мен АӘК алушылар үшін жеңілдіктер қарастырылған: қарызы 1 миллион теңгеге дейін болса - 1,5 жыл бойы айына 56 мың теңгеден, ал ірі сомадағы (5–7 миллион теңге) қарызы болса - 7 жыл бойы ай сайын 84 мың теңгеден төлейді.

Рәсім қалай жүзеге асады?

Қарыз алушы Finkelisim.kz сайтында тіркеліп, міндетті биометриялық сәйкестендіруден (бет-әлпетті тексеру) өтуі қажет. Платформа кредиттік бюролардан деректерді өзі жинайды және критерийлер сәйкес келсе, ақпаратты кредиторларға жібереді.

Шарттар келісілгеннен кейін пайдаланушының жеке кабинетіне құжаттар (медиативтік келісімдер мен жаңа кесте) келеді. Оларға 72 сағат ішінде ЭЦҚ арқылы қол қою керек, әйтпесе өтінім күші жойылады.

Қарыз алушы үшін ұжымдық реттеу рәсіміне қатысу тегін, тек медиатор қызметі үшін ақы алынады. Бұл ретте 2027 жылғы 1 қаңтарға дейін шығындар банк және микроқаржы омбудсмандеры есебінен жабылады. Құжаттарға қол қойылған соң, қарыз алушы платформада бір төлем жасайды, ал жүйе ақшаны банктер арасында өзі бөледі.

Назар аударыңыз

Жаңа тетік - қарыздарды сотсыз және шоттарға бұғат қойдырмай, ерікті түрде жабу мүмкіндігі. Алайда, егер қарыз алушы жаңа кестені бұзып, 40 күннен астам уақытқа кешіктірсе, несие берушілер мәжбүрлеп өндіріп алу құқығын қайтарып алады. Бұл бағдарламаға қайта қатысуға болмайды, ал табысы мүлдем жоқ азаматтарға реттеуші eGov.kz порталы арқылы соттан тыс банкроттық нұсқасын қарастыруды ұсынады.

Бұған дейін үкімет Халықтың табысын арттырудың 2026–2029 жылдарға арналған кешенді жоспарын бекіткен болатын. Құжатта жалақы, жұмыс орындары, азық-түлік бағасы, салықтық жеңілдіктер, әлеуметтік қолдау және қазақстандықтардың борыштық жүктемесін азайту бойынша шаралар көрсетілген. Толығырақ материалдан оқыңыз.

Тағы оқыңыз: “Несие мен ипотеканы бұдан былай төлей алмаймын“. Қарызы бар қазақстандықтар не істеуі керек?