Бірнеше несиесі барларға үлкен жаңалық: қарызды 5 жылға дейін созуға болады

Қаржы нарығын реттеу және дамыту агенттігі қазақстандықтардың несие шарттарын өзгерту тәртібін айқындайтын бұйрық жобасын әзірледі, – деп хабарлайды Aikyn.kz сайты. 

Құжат «Ашық НПА» порталында жарияланып, 13 ақпанға дейін талқыланады.

Жоба банктер мен микроқаржы ұйымдарына азаматтардың несие шарттарын өзгерту туралы өтініштерін қараудың бірыңғай ережелерін енгізуді көздейді. Атап айтқанда, өтінішті қарау мерзімдері белгіленіп, осы кезеңде қарызды өндіріп алуға және қосымша төлемдер талап етуге тыйым салынады. Сондай-ақ, клиентке қаржылық омбудсманға жүгіну құқығын түсіндіру міндеттеледі.

Құжатта қарыз алушының қаржылық жағдайының нашарлағанын растайтын құжаттар тізімі нақтыланған. Мүгедектігі бар азаматтар үшін талаптар жеңілдетіледі.

Әлеуметтік қолдау шаралары да қарастырылған:

- Әлеуметтік әлсіз топтар мен төтенше жағдайдан зардап шеккендер үшін негізгі қарыз бен пайыз төлемдері кемінде 3 айға комиссиясыз кейінге қалдырылады.

- Бірнеше несиесі бар азаматтар қарызын қаржылық омбудсман арқылы 1 жылдан 5 жылға дейін қайта құрылымдай алады.

- Мерзімді әскери қызметтегі сарбаздар үшін қызмет ету кезеңінде және одан кейін 60 күн бойы пайыз есептелмейді, төлемдер тоқтатылады.