Алматының 5 көшесі Үлкен Алматы айналма жолына дейін ұзартылады

Қала әкімдігінің мәліметінше, қазір Тілендиев, Солтүстік айналма, Саин көшелерін, сондай-ақ Рысқұлов пен Абай даңғылдарын қала шекарасына дейін ұзарту жұмыстары жүріп жатыр. Оның ішінде біразы жер телімдерін сатып алу сатысында тұр.

Алдағы уақытта осы 5 көше Үлкен Алматы айналма автомобиль жолына дейін ұзартылмақ.

- Қала облыс аумағындағы жол салу бойынша міндеттемелерді өзіне алды. Жобалық-сметалық құжаттама дайындалды. Ал облыс жер телімдерін сатып алу жұмыстарын жүргізіп жатыр, - деп хабарлады әкімдіктен.

Радиалды көшелердің ұзартылуы Алматы мен облыс арасындағы көлік байланысын жақсартып, қалаға кіретін магистральдар санын арттыруға мүмкіндік бермек.

Еске салайық, бұған дейін Алматыда Сәтбаев көшесі Шығыс айналма жолына дейін ұзартылатынын жазғанбыз.