​Бішкектегі 75‑іс бойынша жаңа жанжал шықты

Қырғызстанда билікті басып алуға дайындыққа қатысты «75‑іс» төңірегінде шу шықты: әлеуметтік желілерде саясаткерлердің жасырын тергеу бейнежазбалары жарияланып кетті, деп хабарлайды 24.kg.

Желіге тараған кадрларда бұрынғы ҰҚК басшысы Камчыбек Ташиевке ұқсайтын адам «75‑хаттың» қалай пайда болғанын айтып береді. Оның сөзінше, құжатты саясаткерлер мен қоғам қайраткерлері әзірлеген, кейін депутаттар қол жинай бастаған. Бейнежазбаларда Ташиев тергеушілерге қатаң мәлімдемелер жасап, қажет болса өз ресурстарын қолданатынын ескертеді. Ол «елдегі тыныштық алдамшы» екенін айтып, қажет жағдайда мыңдаған жақтастары митингке шығатынын жеткізген. Сонымен қатар интернетте Эмилбек Узақбаев пен Бекболот Талгарбековтің де жауаптары жарияланды. Олар даулы хаттың парламентке қалай жеткізілгенін талқылаған.

Бұл кадрлар дәл сол кезде Бішкектің Первомай аудандық соты істі алғаш рет ашық режимде қарауға көшкен сәтпен тұспа‑тұс шықты.

Ресми органдар әзірге бейнежазбалардың түпнұсқалығына қатысты пікір білдірген жоқ. Кім және қай кезеңде түсіргені де белгісіз.

Еске салсақ, «75‑іс» бойынша айып тағылғандар қатарында бұрынғы ҰҚК басшысы Камчыбек Ташиев, экс‑бас прокурор Курманкул Зулушев, бұрынғы парламент спикері Нурланбек Тургунбек уулу және басқа да жоғары лауазымды тұлғалар бар. Оларға билікті күшпен басып алуға дайындалды деген ауыр айып тағылған.

Бүгін, 14:16