​Атыраулық ЖҚАЖ да жанжал шықты

Әлеуметтік желілерде тараған бейнежазбада полиция басшылары өз қарамағындағы қызметкерлерді балағаттап, тіпті қол көтергені көрінеді. 

Оқиға қызметтік бөлмеде болған: екі ЖҚАЖ (жылдам қимылдайтын арнайы жасақ) қызметкерін ауыр сөздермен қорлап, біреуін қолымен және белгісіз затпен беттен ұрған. Сол сәтте бөлме ішіндегі тағы бір адам есіктің тұтқасын ұстап, ешкім кіріп кетпесін деп сақтанған.

Бейнежазбаға қоса берілген арызда басты «кейіпкерлер» ретінде Атырау облыстық полиция департаментінің СОБР командирі Еркебұлан Сапанов, сондай-ақ рота командирлері Ерік Қарабаев пен Нұрбақыт Басаров аталған.

Атырау облысы полиция департаментінің баспасөз қызметі оқиғаны растады: 

«ЖҚАЖ қызметкерінің қызметтік тәртіпті бұзу фактісі расталды. Қызметкер тәртіптік жауапкершілікке тартылды. Сонымен қатар, бөлініс басшылығы тарапынан орын алған әдепсіз әрекеттерге байланысты қызметтік тексеру басталды. Тексеру нәтижесі бойынша тиісті баға берілетін болады», – делінген ресми хабарламада.

Еске салсақ, бұл ЖҚАЖ-дағы алғашқы жанжал емес. Екі жыл бұрын бөлім қызметкерлері анонимді түрде басшылық тарапынан жүйелі түрде ақша жинау мен әділетсіздікке шағымданған еді. Ол кезде тексеріс нәтижесінде арыздағы деректер расталмаған, ал ақша жинау «материалдық көмек көрсету үшін» деп түсіндірілген болатын.

Лев ГУЗИКОВ

Бүгін, 14:44