Биыл 596 медицина қызметкері баспаналы болды

Биыл «Дипломмен ауылға» бағдарламасымен 600-ге жуық медицина маманы шалғай аймақтарға жолданды.

10 айдың қорытындысы бойынша 300-ге жуығына көтермеақы төленіп, баспана берілген екен. Жалпы 2025 жылы 596 медицина қызметкері тұрғын үйге қол жеткізіпті.  

«Дипломмен ауылға» бағдарламасы аясында Ақмола облысына жас мамандар көбіне басқа қалалардан келетін. Ал, қазір болашақ дәрігерлер облыс орталығында да даярланады. Биыл 100-ден астам түлек оқуын бітіріп, еңбек жолын осы аймақтан бастады. Олардың қатарында – Динара Бекімова да бар. Жас маман өзінің еңбек жолын ауылдан бастауды жөн санапты.

Динара Бекімова, дәрігер:

- Мен «Дипломмен ауылға» бағдарламасы бойынша келдім. Кез келген жас маман ең алдымен осындай ауылдық жерлерде жұмыс істеп, тәжірибе жинақтау керек деп есептеймін. Биылдан бастап ауылға келген жас мамандарға 8,5 млн теңгеден көтерме ақы беріліп жатыр. Бұл үлкен қолдау.

Бақыт Төребекова, облыстық Денсаулық сақтау басқармасының бас маманы:

- Былтыр келген 117 жас маманға бір реттік әлеуметтік қолдау көрсетілді. Оған 492 млн теңге бөлінді. Биылдан бастап ауылдық жерлерге баратын жас мамандарға 8,5 млн теңгеден көтерме ақы қарастырылған.

Айта кетейік, 10 айдың көрсеткіші бойынша, 298 маман көтермақы алған. Былтыр 254 медицина маманы баспаналы болса, биыл олардың қатары екі есе артты. Медицина қызметкерлернің еңбек жағдайын жақсартуда біршама жұмыс атқарылды. Мәселен, Қостанай облыстық жедел жәрдем станциясының техника паркі 50 жаңа көлікпен толықты. Денсаулық сақтау министрі Ақмарал Әлназарова өз сөзінде медицина жүйесінің инфрақұрылымын дамытумен қатар, қызметкерлердің әлеуметтік мәселелері де ерекше назарда екендігін атап өтті.

Ақмарал Әлназарова, ҚР Денсаулық сақтау министрі:

- Биылғы жылы шілде айында Президент тарапынан құқық жағынан біздің мамандарды қорғау мәселесіне қылмыстық кодекстерге өзгерістерді еңгізу тапсырылды.

Иә, желтоқсан айында Парламент өз міндеттерін орындап жүрген жедел жәрдем қызметкерлерін қорқыту, шабуыл жасау және зорлық-зомбылық үшін қылмыстық жазаны күшейтетін заң жобасын қабылдады. Бұл да денсаулық сақтау жүйесіндегі мамандардың құқығын қорғап, қауіпсіздігін күшейту мақсатында қолға алынған бірден бір шара.

Авторы: Бақыт Топтаева