Біз Солтүстік Кореядамыз ба? Орал мектептеріндегі шаш үлгісіне қойылатын талаптар ата аналардың ашуын туғызды

Оралда мектеп оқушыларының ата-аналары педагогтардың ата-аналар чатына жіберіп жатқан нұсқаулықтарына наразылық білдірді, деп хабарлайды Tengrinews.kz "Мой ГОРОД"-қа сілтеме жасап.

Жадынамада мектеп формасына, аяқ киімге, сырт келбетке және оқушылардың шаш үлгісіне қойылатын талаптар көрсетілген.

Ата-аналар форма мен аяқ киімге қатысты талаптармен келіскенімен, шаш үлгісіне қатысты ережелерді тым қатаң деп санайды. Жадынамаға сәйкес, қыздарға шаш үлгісінің тек үш түріне – биік жиналған шаш, өрім және түйінге рұқсат етілген. Ұлдар үшін бір ғана нұсқа қарастырылған. Сондай-ақ жадынамада аксессуар тағуға, макияж жасауға, тырнақ және шашты бояуға тыйым салынған.

"Мектеп чатына балалардың шаш үлгісі қандай болуы керектігі туралы жадынама жіберді. Мен бұған өте ашулымын! Біз Солтүстік Кореяда емеспіз ғой?! Мектепке шаш үлгісін таңдау құқығын кім берді? Форма бойынша бәрі түсінікті, оған қарсылығым жоқ, бірақ шаш үлгісіне қатысты талаппен үзілді-кесілді келіспеймін", - деді оқушының анасы Әлия.

"Біріншіден, бұл - өзін-өзі көрсету мүмкіндігі (түсі туралы айтып тұрған жоқпын, бояуға тыйым сала берсін), педагогтар жасөспірімдер үшін бұның қаншалықты маңызды екенін бәрінен жақсы білуі тиіс. Екіншіден, эстетикалық жағы да бар. Құлағы қалқиған балалар не істеуі керек? Мен өзім де содан қысылатынмын, сондықтан шашыммен құлағымды жауып жүретінмін. Үшіншіден, ата-аналардың бәрінің бірдей балаларын мектепке жинап жіберуге мүмкіндігі жоқ, көптеген оқушы сабаққа өздері дайындалып кетеді. Қыз бала шашын қалай өзі түйіп немесе өріп үлгереді?!" - дейді ата-ана.

Батыс Қазақстан облыстық білім басқармасы бұл жағдайға қатысты жадынамадағы шаш үлгілері тек мысал ретінде көрсетілгенін түсіндірді. Сонымен қатар сабаққа шашты бояп және макияж жасап баруға тыйым салынатынын ескертті.

Google News арқылы жаңалықтарымызды қадағалаңыз